Sonam Wangchuk: लडाखचे डीजीपी एसडी सिंह जामवाल यांनी शनिवारी मोठा खुलासा केला. पर्यावरण कार्यकर्ते सोनम वांगचुक पाकिस्तानी अधिकाऱ्याच्या संपर्कात होते. त्यांनी स्पष्ट केले की पोलिसांनी अलीकडेच एका पाकिस्तानी गुप्तचर अधिकाऱ्याला अटक केली असून तो वांगचुक यांच्याशी संपर्कात होता आणि सीमेपलीकडून अहवाल पाठवत होता. डीजीपींनी पुढे सांगितले की वांगचुक पाकिस्तानमधील एका कार्यक्रमात सहभागी झाले होते. तसेच बांगलादेशलाही गेले होते. या प्रकरणाची चौकशी सुरू असल्याचेही त्यांनी सांगितलं आहे.
वांगचुक यांना अटक –
दरम्यान, शुक्रवारी वांगचुक यांना राष्ट्रीय सुरक्षा कायद्यानुसार (NSA) अटक करून राजस्थानमधील जोधपूर मध्यवर्ती तुरुंगात हलवण्यात आले. वांगचुक यांनी त्यांच्यावरचे आरोप कटाचा भाग असल्याचा दावा केला असून, केंद्र सरकार लोकांच्या मागण्या पूर्ण करण्याऐवजी माझा बळीचा बकरा म्हणून वापर करत आहे, असं म्हटलं होतं.
हेही वाचा – सामाजिक कार्यकर्ते सोनम वांगचुक यांना अटक; लेहमध्ये इंटरनेट सेवा बंद, हिंसाचारात 4 जणांचा मृत्यू
हिंसाचार भडकवल्याचा आरोप
लेहमध्ये 24 सप्टेंबर रोजी झालेल्या निदर्शनादरम्यान वांगचुक यांच्यावर हिंसाचार भडकवल्याचा आरोप करण्यात आला आहे. निदर्शकांनी भाजप कार्यालय आणि गाड्यांना आग लावली होती, ज्यात 4 जणांचा मृत्यू तर 80 हून अधिक जखमी झाले होते. केंद्र सरकारनेही वांगचुक यांना जबाबदार ठरवले असून, त्यांच्यावर भडकाऊ विधाने केल्याचा आणि राजकीयदृष्ट्या प्रेरित गटांशी संबंध ठेवून चर्चा बिघडवल्याचा आरोप केला आहे.
तथापी, डीजीपी जामवाल यांनी सांगितले की, हिंसाचाराच्या तपासात आणखी दोन जणांना अटक करण्यात आली आहे. नेपाळी नागरिकांसह काही परदेशी घटक या प्रकरणात सहभागी असावेत अशी शक्यता व्यक्त केली जात आहे. याशिवाय वांगचुक यांच्या निधीविषयी एफसीआरए कायद्यांतर्गत चौकशी सुरू असल्याची माहितीही डीजीपींनी दिली.
