बारामती: माळेगाव (ता. बारामती) सहकारी साखर कारखान्याचा १५ लाख गाळपाचा विक्रम आहे. माळेगावला तिकीट देताना मोठा बदल करणार आहे. कोणाला पॅनल करायचा त्यांनी करा, मी समोरचा पॅनल तगडा आहे, असे समजून लढणार आहे. १३ जून रोजी प्रचाराचा नारळ फोडताना चेअरमन जाहीर करणार आहे. माळेगावच्या सभासदांनी माझ्याकडे बघून मतदान करा, असे आवाहन अजित पवार यांनी केले.
माळेगाव सहकारी साखर कारखाना कार्यक्षेत्रातील सर्व सभासद बंधू-भगिनी व राष्ट्रवादी काँग्रेस पक्षाच्या आजी-माजी पदाधिकारी, कार्यकर्त्यांच्या मेळाव्यात गुरुवार, २२ रोजी उपमुख्यमंत्री अजित पवार बोलत होते. अजित पवार म्हणाले की, कारखान्याच्या ३७ गावांतील १९ हजार ६५१ सभासद असून, अनेक जण मुख्यमंत्र्यांना सांगत होते. निवडणुका लवकर लावा, उठसुठ काहीजण मुंबईला जात होते. आपण महायुतीत काम करतो, काहीजण आम्ही अमित शाह यांच्याकडून काम करून आणतो, असे सांगतात. त्यावर पवार म्हणाले, अरे बाबा अमित शाह तुला ओळखतात का? जर माझ्या मतदारसंघात लक्ष घालत असाल, तर मलादेखील तिकडे लक्ष घालावे लागेल. मी धडधाकट आहे, असे नाव न घेता विरोधकांना टोला लगावला.
संचालकांना सुनावले
माळेगाव साखर कारखान्याचे ऊसाला चांगला भाव दिला असून, यापुढे कारखान्याची संचालकाना गाडी बंद करणार आहे. कोणी काय उद्योग केले ते मी पाहणार आहे. अतिरिक्त खर्च थांबवणार, तोडणी वाहतूक विकास शिफारस चालू देणार नाही. आता माळेगावमध्ये लक्ष घालणार आहे, कारखान्याचे घाण पाणी बंद करणार, केंद्र-राज्यांच्या योजना, हार्वेस्टिंग, कृषीच्या योजना आणणार आहे. ज्यांना पॅनलमध्ये जागा मिळाली नाही, त्यांनी नाराज होऊ नका. उद्योगपतींकडून सीएसआर फंडातून कारखान्याला मदत करणार आहे.
