Sambhajinagar Election: महापालिका निवडणुकीच्या उमेदवारी अर्ज भरण्यासाठी अवघे दोन तास शिल्लक असताना, छत्रपती संभाजीनगर भाजपमध्ये उभी फूट पडल्याचे पाहायला मिळत आहे. महायुती तुटल्यानंतर निष्ठावंतांना उमेदवारीची आशा होती, मात्र ऐनवेळी नावे कापली गेल्याने मंत्री अतुल सावे यांच्या कार्यालयाला गोंधळाची परिस्थिती निर्माण झाली. तथापी, भाजपच्या कट्टर कार्यकर्त्या दिव्या मराठे यांनी थेट पक्षाच्या कार्यालयाबाहेर अंगावर पेट्रोल ओतून आत्मदहनाचा प्रयत्न केला.
तब्बल १५-२० वर्षांपासून पक्षासाठी राबणाऱ्या कार्यकर्त्यांना जेव्हा उमेदवारी नाकारल्याचे समजले, तेव्हा संतापाचा उद्रेक झाला. वॉर्ड क्रमांक २२ मधील इच्छुक उमेदवाराला आणि त्यांच्या पत्नीला भररस्त्यात रडू कोसळले. तथापी, शिवाजीनगर भागातील एक महिला कार्यकर्ता स्वतःच्या कष्टाचा पाढा वाचताना रडत-रडत बेशुद्ध पडली. भाजपच्या ज्येष्ठ कार्यकर्त्या लता दलाल यांच्यासह अनेक जुन्या चेहऱ्यांना डच्चू मिळाल्याने कार्यकर्त्यांनी भाजपच्या तंबूतच ठिय्या मांडला.
गंभीर आरोपांनी खळबळ
केवळ नाराजीच नाही, तर यावेळी कार्यकर्त्यांनी भाजपच्या स्थानिक नेतृत्वावर अत्यंत गंभीर आरोप केले आहेत. “आम्ही रक्ताचे पाणी करून पक्ष वाढवला, आंदोलनांच्या केसेस अंगावर घेतल्या. पण आज निष्ठावंतांना डावलून, जाड पाकीट देणाऱ्या नवीन उपऱ्यांना उमेदवारी विकली गेली,” असा खळबळजनक आरोप संतापलेल्या महिला पदाधिकाऱ्यांनी केला. मंत्री अतुल सावे यांना जाब विचारण्यासाठी कार्यकर्त्यांनी कार्यालयात घुसण्याचा प्रयत्न केला, तेव्हा पोलिसांनी त्यांना अडवल्याने मोठा संघर्ष झाला.
भाजपसमोर मोठे आव्हान
पक्षाने विश्वासघात केल्याची भावना व्यक्त करत अनेक इच्छुकांनी आता ‘अपक्ष’ लढण्याचे रणशिंग फुंकले आहे. “आम्ही निवडणूक जिंकू किंवा न जिंकू, पण भाजपच्या अधिकृत उमेदवाराला नक्कीच पाडू,” असा उघड इशारा एका महिला उमेदवाराने दिला आहे. संभाजीनगरमधील अनेक प्रभागांत आता भाजपला विरोधकांपेक्षा स्वकीय बंडखोरांचाच जास्त धोका निर्माण झाला आहे.
