Indapur Election: इंदापूर नगरपरिषदेतील माझ्या कार्यकाळात “एक रुपयाचा देखील भ्रष्टाचार झाल्याचे आढळल्यास मी तत्काळ निवडणुकीतून माघार घेईन, असे विधान राष्ट्रवादी काँग्रेस (अजित पवार) पक्षाचे नगराध्यक्ष पदाचे उमेदवार भरत शहा यांनी केले. माहितीचा अधिकार वापरून माझ्या कालावधीतील सर्व कामांची पडताळणी करा, असे खुले आव्हान त्यांनी विरोधकांना दिले. छत्रपती संभाजी चौकातील आयोजित प्रचार सभेत ते बोलत होते. या सभेस कृषी मंत्री दत्तात्रय भरणे, पुणे जिल्हा बँकेचे संचालक अप्पासाहेब जगदाळे, अशोक इजगुडे, अरविंद वाघ, तालुकाध्यक्ष हणुमंत कोकाटे, कार्याध्यक्ष अतुल झगडे, आरपीआयचे शिवाजी मखरे, बाळासाहेब सरवदे तसेच शिवसेना (एकनाथ शिंदे) गटाच्या सीमा कल्याणकर यांसह अनेक मान्यवर उपस्थित होते.
शहा म्हणाले, इंदापूर नगरपरिषदेची चतुर्थ घरपट्टी, शास्ती आणि दंडव्याज वाढल्यामुळे माजी सहकार मंत्री हर्षवर्धन पाटील यांनी दर्गा मज्जिद चौकातील सभेत मतदारांची जाहीर माफी मागितली होती. मागील निवडणुकीमध्ये चुकीचा उमेदवार दिला असल्याची कबुली हर्षवर्धन पाटलांनी दिली असे सांगून भरत शहा पुढे म्हणाले आम्ही निवडलेला नेताच चुकीचा होता की काय असा पलटवार केला.
हेही वाचा – इंदापूरचा चेहरा मोहरा बदल्यासाठी निधीची कमतरता पडू देणार नाही; दत्तात्रय भरणे यांची मोठी घोषणा
मागील पाच वर्षाच्या काळामध्ये आम्ही भ्रष्टाचार केला असल्याचे आरोप विरोधक सातत्याने करत आहेत, आमच्या कार्यकाळातील प्रत्येक योजनेची माहितीच्या अधिकाराखाली माहिती मिळवावी जर आम्ही एक रुपयाचा भ्रष्टाचार केला असेल असे आढळल्यास या निवडणुकीतीतून त्याच क्षणी माघार घेतो असा इशारा शहा यांनी दिला.
नेत्यांनी आपल्या कार्यकर्त्यांना शास्ती संदर्भात चुकीची माहिती देवू नये, शास्ती ही बेकायदेशीर झालेल्या बांधकामावर किंवा घरपट्टी न भरलेल्या मालमत्ता धारकांना बसते. राज्यसरकारने इंदापूर शहरातील शास्ती बसलेल्या मालमत्ता धारकांची व घरपट्टी लागलेल्या व्याजात सवलत द्यावी या आशयाचे पत्र आयुक्त तथा संचालक नगरपरिषद प्रशासन संचालनालयाला, नवी मुंबई यांना 9/10/2025 रोजी देण्यात आलेले आहे. अभय योजनेमध्ये इंदापूर शहरातील मालमत्ता धारकांना शास्ती पूर्णपणे माफ करण्याचा प्रस्ताव उपमुख्यमंत्री अजित पवार, कृषी मंत्री दत्तात्रय भरणे यांच्या मार्गदर्शनाखाली सादर केला आहे असे भरत शहा यांनी सांगितले.
