नाशिक: कृषिमंत्री माणिकराव कोकाटे यांच्या 2 वर्षाच्या शिक्षेला स्थगिती देताना नाशिकच्या सत्र न्यायालयाने काही महत्त्वपूर्ण निरीक्षण नोंदवले आहे. कोकाटे यांच्या शिक्षेला स्थगिती दिली नाही, तर ते अपात्र ठरू शकतात. त्यामुळे त्यांच्या विधानसभा मतदारसंघात पुन्हा निवडणूक घेण्याची वेळ आली तर जनतेच्या पैशाचा खर्च होईल, असे निरीक्षण कोर्टाने नोंदवले आहे. त्याचबरोबर काँग्रेस नेते राहुल गांधी यांच्या केसचाही दाखला कोकाटेंच्या केसच्या निकालात विचारात घेण्यात आल्याची माहिती कोकाटे यांचे वकील अॅड. अविनाश भिडे यांनी दिली आहे.
कोकाटे हे गेल्या 35 वर्षांपासून जनेतेचा विश्वास संपादन करून निवडून येत आहेत. ते सध्या कॅबिनेटमंत्री असल्याने राज्यभर त्यांना काम करण्याची संधी आहे. जर त्याच्या शिक्षेला स्थगिती मिळाली नाही, तर जनतेच्या सेवेची संधी मिळणार नाही. अपील जोपर्यंत सुरू आहे, अंतिम निकाल लागत नाही तोपर्यंत स्थगिती द्यावी, असा युक्तिवाद बचाव पक्षाकडून करण्यात आला होता.
त्याचबरोबर कोकाटे यांनी 1989 मध्ये शासनाच्या सदनिकासाठी अर्ज दाखल केला होता. अतिरिक्त मुख्य न्यायदंडाधिकारी यांनी 1992 नंतरचे उत्पन्न विचारात घेतले आहे. 1989ची आर्थिक परिस्थिती कशी होती हे सिद्ध करता आले नसल्याचेही निरीक्षण कोर्टाने नोंदवले आहे. त्यामुळे सर्व बाजूंचा विचार करून सत्र न्यायालयाने कोकाटे यांच्या दोन वर्षांच्या शिक्षेला स्थगिती दिली असल्याची माहिती अॅड. अविनाश भिडे यांनी दिली.
