पुणे: स्थानिक स्वराज्य संस्थांच्या निवडणुकांचा रणसंग्राम जवळ येत असतानाच भाजपने महाराष्ट्रभरातील निवडणूक प्रमुख आणि प्रभारींच्या नियुक्त्या जाहीर केल्या आहेत. पक्षाने प्रत्येक जिल्ह्यात नेतृत्व निश्चित करत निवडणुकीची रणधुमाळी अधिक तीव्र केली आहे. बीड जिल्ह्यात आमदार सुरेश धस यांची जिल्हा निवडणूक प्रमुखपदी नियुक्ती करण्यात आली असून, मंत्री पंकजा मुंडे यांच्यावर निवडणूक प्रभारीची जबाबदारी सोपवण्यात आली आहे. विधानसभा निवडणुकीनंतर दोघांमध्ये निर्माण झालेल्या मतभेदांच्या पार्श्वभूमीवर, आता या दोघांना पक्षाच्या विजयासाठी एकत्र काम करावे लागणार आहे. त्यामुळे बीड जिल्ह्यातील भाजपचे राजकारण पुन्हा चर्चेत आले आहे.
दरम्यान, ठाणे जिल्हा आणि परिसरात भाजपने आपल्या निवडणूक मोहिमेचा बळकटीकरणाचा प्रयत्न सुरू केला आहे. मुख्यमंत्री एकनाथ शिंदे यांच्या गड मानल्या जाणाऱ्या या भागात मंत्री गणेश नाईक यांची निवडणूक प्रभारी म्हणून नियुक्ती करण्यात आली आहे. ठाणे शहर, ग्रामीण, कल्याण, उल्हासनगर, मीरा-भाईंदर, भिवंडी आणि नवी मुंबई या सर्व ठिकाणांच्या निवडणुकांचे सूत्र त्यांच्या हाती असेल.
राज्यातील प्रमुख जिल्ह्यांतील नियुक्त्या
- सिंधुदुर्ग: नितेश राणे – निवडणूक प्रभारी
- पुणे ग्रामीण: गणेश बिडकर – निवडणूक प्रमुख
- मुंबई: आशिष शेलार – निवडणूक प्रभारी
- सोलापूर: मंत्री जयकुमार गोरे – प्रभारी
- छत्रपती संभाजीनगर: मंत्री अतुल सावे – प्रभारी
- नांदेड: खासदार अशोक चव्हाण – प्रभारी
- कोल्हापूर: खासदार धनंजय महाडिक – प्रभारी
- रायगड: प्रशांत ठाकूर – प्रभारी
- नाशिक: गिरीश महाजन – प्रभारी
- जळगाव: संजय सावकारे – प्रभारी
- अहिल्यानगर: मंत्री राधाकृष्ण विखे पाटील – प्रभारी
- पुणे जिल्हा: केंद्रीय मंत्री मुरलीधर मोहोळ – प्रभारी
- रत्नागिरी: निरंजन डावखरे – प्रभारी
- सातारा: मंत्री शिवेंद्रराजे भोसले – प्रभारी
स्थानिक स्वराज्य संस्थांच्या निवडणुकीची घोषणा होताच भाजपने संघटनात्मक तयारीला वेग दिला आहे. निवडणूक प्रमुख आणि प्रभारींची यादी जाहीर करून पक्षाने स्पष्ट संदेश दिला आहे की येणाऱ्या निवडणुकांमध्ये भाजप पूर्ण ताकदीने उतरून प्रत्येक जिल्ह्यात विजय मिळवण्याचा निर्धार केला आहे.
