Ashish Deshmukh Controversy: राज्यात स्थानिक स्वराज्य संस्था निवडणुकीचा प्रचार जोरदार सुरू आहे. प्रचार सभांत सत्ताधारी आणि विरोधकांमध्ये जोरदार शाब्दिक युद्ध रंगताना दिसत आहे. महायुतीतील मित्रपक्ष एकमेकांवर टीका करत असतानाच, कळमेश्वर नगरपरिषद निवडणुकीतील एका सभेत भाजप आमदार आशिष देशमुख यांनी केलेले वक्तव्य नव्या वादाला कारण ठरले आहे. प्रचारादरम्यान देशमुखांनी विरोधकांना उद्देशून “जास्त वळवळ केली तर कापून काढू” अशी उघड धमकी दिल्याचा आरोप होत आहे. त्यांचे हे वक्तव्य सोशल मीडियावर मोठ्या प्रमाणात प्रसारित झाले असून, विरोधी पक्षांनी त्यावर तीव्र प्रतिक्रिया व्यक्त केली आहे.
रोहित पवारांचा थेट सवाल
राष्ट्रवादी काँग्रेस (शरद पवार गट) आमदार रोहित पवार यांनी आशिष देशमुखांचा व्हिडिओ शेअर करत जोरदार टीका केली. आपल्या पोस्टमध्ये ते म्हणाले की, मुख्यमंत्री आणि गृहमंत्री दोघेही नागपूरचे, आणि सभेतून आमदार विरोधकांना ‘कापून काढू’ अशी धमकी देतात! ही भाषा नक्षलवाद्यांची नव्हे तर भाजप आमदाराची आहे. राजकीय मतभेद असतात, पण विरोधकांना संपवण्याची मानसिकता लोकशाहीला धोकादायक आहे.” तसेच पुढे ते म्हणाले की, “मुख्यमंत्र्यांनी या वक्तव्यावर स्पष्ट भूमिका घ्यावी. अन्यथा या धमकीला त्यांचा अप्रत्यक्ष पाठिंबा असल्याचे मानले जाईल.”
हेही वाचा – “आपले जमीन घोटाळे निघाले तर कुठपर्यंत जातील याचा विचार करावा”; जयकुमार गोरेंचा रोहित पवारांना इशारा
“मुख्यमंत्री, गृहमंत्री नागपुरातले, जास्त वळवळ केली तर कापुन काढू” हे शब्द कुण्या नक्षलवाद्याचे नाहीत तर भाजपचे आमदार आशिष देशमुख यांनी जाहीर व्यासपीठावरून विरोधकांना दिलेली ही धमकी आहे. राजकीय विरोध असावा पण विरोधकांना थेट कापून टाकण्याची ही मानसिकता भाजप नेत्यांमध्ये येते… pic.twitter.com/i9MPHeaUU8
— Rohit Pawar (@RRPSpeaks) November 28, 2025
सभेत मंत्री बावनकुळेही उपस्थित
देशमुखांच्या या विधानावेळी महसूल मंत्री चंद्रशेखर बावनकुळे हेही व्यासपीठावर उपस्थित होते. त्यामुळे प्रकरणाला आणखी राजकीय रंग चढला आहे. कळमेश्वर परिसरात नुकत्याच घडलेल्या एका घटनेत, काँग्रेसच्या माजी नगरसेवकावर भाजपचा प्रचार करतो का अशी विचारणा करून एका व्यक्तीला मारहाण केल्याचा आरोप झाला होता. या प्रकरणामुळे वातावरण आधीच तापले होते. त्यात देशमुखांच्या वक्तव्यामुळे राजकीय तणाव अधिक चिघळला आहे.
