Chhatrapati Sambhajinagar Municipal Corporation Reservation: छत्रपती संभाजीनगर महानगरपालिका निवडणुकीसाठी (Chhatrapati Sambhaji Nagar Municipal Election) आरक्षणाची सोडत जाहीर करण्यात आली आहे. शहरातील 29 प्रभागांतून 115 नगरसेवकांची निवड होणार असून, यातील 58 जागा महिलांसाठी राखीव ठेवण्यात आल्या आहेत, तर 57 जागा खुल्या प्रवर्गातील उमेदवारांसाठी असतील.
- महिलांसाठी राखीव एकूण जागा – 58
- सर्वसाधारण महिला – 30
- ओबीसी महिला – 16
- अनुसूचित जाती महिला – 11
- अनुसूचित जमाती महिला – 1
- खुल्या जागा – 57
- सर्वसाधारण पुरुष – 30
- ओबीसी पुरुष – 15
- अनुसूचित जाती पुरुष – 11
- अनुसूचित जमाती पुरुष – 1
आरक्षणाची घोषणा होताच शहरातील राजकीय वातावरणात चैतन्य आले आहे. अनेक इच्छुक उमेदवारांचे आरक्षण त्यांच्या अपेक्षेनुसार निघाल्याने आनंदाचे वातावरण आहे. काही प्रभागांमध्ये मात्र आरक्षण बदलल्यामुळे संभाव्य उमेदवारांना प्रभाग बदलावा लागू शकतो. प्रभाग रचनेनुसार, प्रत्येक प्रभागात दोन महिला आणि दोन पुरुष उमेदवार असण्याची शक्यता असल्याने पक्षांमध्ये “अॅडजस्टमेंट” होईल, अशी आशा व्यक्त केली जात आहे.
हेही वाचा – राजकीय गणित बदललं! परभणी महानगरपालिका निवडणुकीसाठी आरक्षण जाहीर
या आरक्षण सोडतीनंतर काही प्रभागांत पूर्वीचे पुरुष नगरसेवक यावेळी त्यांच्या पत्नींना उमेदवारी देऊ शकतात, अशी चर्चा सुरू आहे. विशेष म्हणजे, माजी महापौर नंदकुमार घोडले यांच्या क्रमांक 29 प्रभागाचे आरक्षण ओबीसी आणि सर्वसाधारण महिला यांच्यासाठी राखीव झाले आहे. त्यामुळे घोडले यांना या प्रभागातून निवडणूक लढवता येणार नाही. परिणामी, त्यांची पत्नी आणि माजी महापौर अनिता घोडले या आता या प्रभागातून उमेदवारीसाठी प्रमुख दावेदार ठरू शकतात. राज्य निवडणूक आयोगाकडून पुढील टप्प्यांसाठी तयारी सुरू झाली असून, अंतिम प्रभाग आरक्षण आणि हरकतींच्या तारखा लवकरच जाहीर केल्या जाणार आहेत.
