परभणी: महाराष्ट्रातील महत्त्वाच्या महानगरपालिकांच्या निवडणुकांची तयारी वेगात सुरू झाली असून, आज परभणी शहर महानगरपालिकेसह राज्यातील काही प्रमुख महापालिकांसाठी जागांचे आरक्षण निश्चित करण्यात आले. राज्य शासनाच्या नियमानुसार महिलांसाठी ५० टक्के आरक्षण लागू असल्याने यंदाच्या निवडणुकीत निम्म्या जागांवर महिला उमेदवार मैदानात उतरणार आहेत. याशिवाय, मराठा समाजाला ओबीसी प्रवर्गातून मिळालेल्या आरक्षणाचा फायदा मराठवाड्यातील अनेक जिल्ह्यांतील इच्छुक उमेदवारांना होणार आहे.
परभणी महानगरपालिकेच्या एकूण ६५ जागांसाठी आरक्षण निश्चिती बी. रघुनाथ सभागृहात पार पडली. आयुक्त नितीन नार्वेकर यांच्या उपस्थितीत झालेल्या या सोडतीदरम्यान २०१७ च्या तुलनेत ओबीसी प्रवर्गातील एक जागा घटली, तर खुल्या प्रवर्गातील एक जागा वाढली आहे. नवीन आरक्षण जाहीर होताच सभागृहात उमेदवार आणि त्यांच्या समर्थकांनी मोठ्या प्रमाणावर उपस्थिती लावली होती. काहींच्या प्रभागात आरक्षण बदल झाल्याने नाराजीचे सूर उमटले, तर काहींसाठी आरक्षण अनुकूल ठरल्याने आनंदाचे वातावरण होते. विशेषतः तरुण कार्यकर्त्यांमध्ये उत्साहाचे वातावरण पाहायला मिळाले.
हेही वाचा – BMC Ward Reservation: मुंबई महापालिका निवडणुकीसाठी आरक्षण सोडत जाहीर; महिला उमेदवारांसाठी 114 प्रभाग राखीव!
परभणी मनपा २०२५ आरक्षण स्थिती
- एकूण जागा : ६५
- खुला प्रवर्ग : २०
- खुला प्रवर्ग महिला : १९
- अनुसूचित जाती : ८ (४ महिला)
- अनुसूचित जमाती (महिला) : १
- ओबीसी : १७ (९ महिला)
आरक्षण सोडत पार पडल्याने आता इच्छुक उमेदवारांच्या प्रचाराची रणधुमाळी अधिक रंगणार असून, परभणी महापालिका निवडणुकीसाठी स्थानिक राजकारणात नव्या समीकरणांची चर्चा सुरू झाली आहे.
