नवी दिल्ली: आशिया कप 2025 च्या पार्श्वभूमीवर भारतीय वेगवान गोलंदाज मोहम्मद सिराजबाबत आनंदाची बातमी समोर येत आहे. आयसीसीने त्याला ऑगस्ट महिन्याचा प्लेअर ऑफ द मंथ म्हणून सन्मानित केले आहे. सिराज सध्या आशिया कपमध्ये खेळत नसला तरी इंग्लंडविरुद्धच्या ओव्हल कसोटीतल्या त्याच्या संस्मरणीय गोलंदाजीमुळे त्याने हा मान पटकावला. सिराजने या पुरस्कारासाठी न्यूझीलंडचा मॅट हेन्री आणि वेस्ट इंडिजचा जेडेन सील्स यांना मागे टाकले.
निर्णायक पाचव्या कसोटी सामन्यात त्याने एकूण 9 विकेट्स घेत भारताला फक्त 6 धावांनी विजय मिळवून दिला. पहिल्या डावात 4 आणि दुसऱ्या डावात 5 विकेट्स घेतल्या. या कामगिरीमुळे भारताने मालिका 2-2 अशी बरोबरीत नेली आणि अँडरसन-तेंडुलकर ट्रॉफी राखण्यात यश मिळवले.
दरम्यान, पुरस्काराबद्दल आनंद व्यक्त करताना सिराज म्हणाला की, ‘हा माझ्यासाठी मोठा सन्मान आहे. अँडरसन-तेंडुलकर ट्रॉफी माझ्या कारकिर्दीतील सर्वात कठीण मालिकांपैकी एक होती. या आव्हानात्मक परिस्थितीत मी संघाला योगदान देऊ शकलो, याचा मला अभिमान आहे.’ तथापी, त्याने आपल्या सहकाऱ्यांचे आणि सपोर्ट स्टाफचे आभार मानत हा पुरस्कार त्यांचाही असल्याचे सांगितले.
याशिवाय, महिला श्रेणीमध्ये, आयर्लंडची अष्टपैलू ओर्ला प्रेंडरगास्ट हिला ऑगस्ट महिन्याची प्लेअर ऑफ द मंथ म्हणून निवडण्यात आले. पाकिस्तानविरुद्धच्या टी-20 मालिकेत तिने 144 धावा केल्या आणि 4 विकेट्स घेतल्या. तसेच युरोप पात्रता स्पर्धेत एकूण 244 धावा आणि 7 विकेट्स घेतल्या. ओर्लानेही पुरस्काराबद्दल समाधान व्यक्त करून आयसीसी, मतदार, सहकाऱ्यांचे आणि स्टाफचे आभार मानले.
