Indapur Politics: इंदापूर शहरात राष्ट्रवादी काँग्रेस (अजित पवार गट) पक्षात उमेदवार निवडीच्या प्रक्रियेवरून मोठा वाद उभा राहिला आहे. पुणे जिल्हाध्यक्ष प्रदीप गारटकर यांनी पक्ष नेतृत्वाला थेट बंडाचा इशारा दिल्याने इंदापूरमधील राजकारण तापले आहे. जेजुरी नगराध्यक्षपदासाठी जयदीप बारभाई यांना उमेदवारी देण्यात आल्याने आधीच नाराजी होती. आता नगरपरिषदेच्या उमेदवारीवरून गारटकर यांनी पक्ष नेतृत्वासह मतभेद उघड केले आहेत.
अजित पवार आणि कृषीमंत्री दत्तात्रय भरणे यांच्या उपस्थितीत पुण्यात झालेल्या बैठकीत मतभेद स्पष्ट झाले. माजी उपनगराध्यक्ष भरत शहा यांना उमेदवारी देण्याच्या प्रयत्नांना गारटकर गटाने तीव्र विरोध दर्शविला. यानंतर गारटकर यांनी इंदापूरमध्ये कार्यकर्त्यांची बैठक घेऊन आपली भूमिका ठामपणे मांडली.
हेही वाचा – इंदापूर नगरपालिका निवडणुकीचे राजकीय गणित अजूनही गुंतागुंतीचे! पाटील विरुद्ध गारटकर संघर्ष पुन्हा रंगणार?
गारटकर म्हणाले, ‘आमच्यामुळेच तुम्ही मंत्री झाला आहात. जर आमच्याशी अन्याय झाला तर आम्हीही पक्षाला कोलल्याशिवाय राहणार नाही. पक्षाने आमच्या भावना मान्य केल्या तर आम्ही अजित पवारांसोबत राहू. अन्यथा राजीनामा देऊन स्वतंत्र आघाडी उभी करू. अर्ज भरण्याच्या शेवटच्या दिवसापर्यंत प्रतीक्षा करू, पण अन्याय सहन करणार नाही.’
सध्या इंदापूरमध्ये राष्ट्रवादी काँग्रेस (अजित पवार गट) दोन गटांत विभागला गेला आहे. गारटकर समर्थकांनी पक्षाविरोधात उभे राहण्याची तयारी दाखवली असून, भाजप आणि शरद पवार गटासोबत नव्या आघाडीची शक्यता व्यक्त केली जात आहे. या संभाव्य बंडखोरीमुळे उपमुख्यमंत्री अजित पवार आणि मंत्री दत्तात्रय भरणे यांच्यासमोर मोठे आव्हान निर्माण झाले आहे. इंदापूरमधील या घडामोडींमुळे राष्ट्रवादी काँग्रेसमध्ये तणाव वाढला असून, पुढील काही दिवसांत परिस्थिती कोणत्या दिशेने जाते याकडे राजकीय धुराणींचे लक्ष लागले आहे.
