Voter Ink Controversy: मतदानानंतर बोटावर लावली जाणारी शाई सहज पुसली जात असल्याच्या तक्रारी आणि सोशल मीडियावर व्हायरल होणाऱ्या व्हिडिओंनी राज्यभरात मोठी खळबळ उडवून दिली आहे. या पार्श्वभूमीवर राज्य निवडणूक आयोगाने अत्यंत कठोर भूमिका घेतली असून, मुद्दाम शाई पुसून संभ्रम निर्माण करणाऱ्यांविरुद्ध कायदेशीर कारवाई करण्याचा इशारा दिला आहे. शाई पुसली जात असल्याचा दावा करणारे व्हिडीओ बनवणे हे गैरकृत्य असून, असा खोडसाळ प्रयत्न करणाऱ्यांना सोडले जाणार नाही, असे मुख्य निवडणूक आयुक्त दिनेश वाघमारे यांनी स्पष्ट केले आहे.
मार्कर पेनचा वापर आणि लाईव्ह टेस्ट
निवडणूक आयोगाने या वादावर स्पष्टीकरण देताना सांगितले की, 2011 च्या शासन निर्णयानुसार स्थानिक स्वराज्य संस्थांच्या निवडणुकांमध्ये शाई लावण्यासाठी ‘मार्कर पेन’चा वापर केला जातो. ही शाई नखावर आणि त्वचेवर 3-4 वेळा घासून लावण्याच्या कडक सूचना सर्व कर्मचाऱ्यांना देण्यात आल्या आहेत. शाईच्या गुणवत्तेची खात्री करण्यासाठी आयोगाने स्वतःच्या कर्मचाऱ्यांच्या बोटावर शाई लावून ‘लाईव्ह टेस्ट’ (चाचणी) देखील केली. ही शाई सहज पुसली जात नसल्याचे या चाचणीत सिद्ध झाले असून, सोशल मीडियावर पसरणारे व्हिडीओ हे केवळ दिशाभूल करण्यासाठी असल्याचे आयोगाने म्हटले आहे.
दुबार मतदानावर बंदी आणि राजकीय टीकेला उत्तर
शाई पुसून पुन्हा मतदान करण्याचा प्रयत्न केल्यास तो गंभीर गुन्हा मानला जाईल आणि अशा ‘बोगस’ मतदारांवर तातडीने अटकेची कारवाई करण्याचे आदेश प्रशासनाला देण्यात आले आहेत. शाई प्रकरणावरून मनसे अध्यक्ष राज ठाकरे आणि उद्धव ठाकरे यांनी प्रशासनावर केलेल्या टीकेला उत्तर देताना आयुक्त म्हणाले की, निवडणूक आयोग कोणाचीही बाजू घेत नाही. सर्व दोष यंत्रणेवर ढकलण्यापेक्षा मतदारांनी आपली जबाबदारी ओळखणे गरजेचे आहे. प्रशासकीय प्रक्रिया पारदर्शक असून त्यात कोणत्याही प्रकारचा हस्तक्षेप केला जात नसल्याचे त्यांनी ठामपणे सांगितले.
‘पाडू’ (PADU) यंत्राबाबत तांत्रिक खुलासा
विरोधी पक्षांनी ‘पाडू’ यंत्राबाबत उपस्थित केलेल्या शंकांचेही आयोगाने निरसन केले आहे. आयोगाच्या मते, हे यंत्र २००४ पासून वापरात असून ते नवीन नाही. केवळ ईव्हीएम (EVM) चा डिस्प्ले बंद पडल्यास अपवादात्मक स्थितीतच याचा वापर केला जातो आणि आतापर्यंत केवळ ०.५ टक्के प्रकरणांतच याची गरज भासली आहे. लोकशाही प्रक्रियेत संशय निर्माण करणे चुकीचे आहे. प्राप्त झालेल्या तक्रारींवर आम्ही तत्काळ कारवाई केली असून संपूर्ण प्रक्रिया पारदर्शक आहे, असे दिनेश वाघमारे यांनी स्पष्ट केले.
