Pune New Mayor: पुणे महानगरपालिका निवडणुकीत भारतीय जनता पक्षाने दोन-तृतीयांश बहुमत मिळवत आपले वर्चस्व पुन्हा एकदा सिद्ध केले आहे. या ऐतिहासिक विजयानंतर आता पुणेकरांच्या नजरा “पुण्याचा पुढचा महापौर कोण?” या प्रश्नाकडे लागल्या आहेत. सलग दोनदा हे पद ‘खुला प्रवर्ग’ (Open) राहिल्यामुळे यंदा भाजपमधील दिग्गजांनी या खुर्चीसाठी आतापासूनच मोर्चेबांधणी सुरू केली आहे. पक्षात अनुभवी नगरसेवकांची मोठी फौज असल्याने अंतिम नाव निश्चित करताना पक्षश्रेष्ठींची कसोटी लागणार आहे.
महापौरपदाच्या शर्यतीत ‘हे’ आहेत चर्चेतील चेहरे
भाजपकडून महापौरपदासाठी अनेक अनुभवी आणि नवीन नावांची चर्चा राजकीय वर्तुळात रंगली आहे. यामध्ये माजी शहराध्यक्ष धीरज घाटे, निवडणूक प्रमुख गणेश बीडकर आणि माजी सभागृह नेते श्रीनाथ भिमाले ही नावे आघाडीवर आहेत. जर हे पद महिलांसाठी राखीव झाले, तर वर्षा तापकीर, मानसी देशपांडे किंवा मंजूषा नागपुरे यांच्या नावाचा विचार होऊ शकतो. याशिवाय राजेंद्र शिळीमकर, प्रसन्न जगताप, अनिल टिंगरे आणि योगेश मुळीक हे देखील प्रबळ दावेदार मानले जात आहेत. तसेच, पक्षात नव्याने आलेल्या पृथ्वीराज सुतार, बाळा ओसवाल आणि सचिन दोडके यांच्या नावांचीही चर्चा सुरू आहे.
आरक्षणाच्या ‘सोडती’कडे सर्वांचे लक्ष
विजयाचा उत्साह असला तरी, अनेक इच्छुकांच्या आशा राज्य सरकारच्या आरक्षणाच्या सोडतीवर अवलंबून आहेत. महापौरपद ‘खुला प्रवर्ग’, ‘महिला’ की ‘मागास प्रवर्ग’ यासाठी राखीव होणार, हे पुढील 2 ते 3 आठवड्यांत स्पष्ट होण्याची शक्यता आहे. या आरक्षणावरच अनेक दिग्गजांचे राजकीय भवितव्य ठरेल. २०१७ च्या सत्तेत भाजपने मुक्ता टिळक आणि मुरलीधर मोहोळ यांच्या रूपाने सक्षम नेतृत्व दिले होते; आता या दुसऱ्या इनिंगमध्ये पक्ष आक्रमक अनुभवी नेत्याला संधी देतो की नव्या चेहऱ्याला, याकडे संपूर्ण राज्याचे लक्ष लागले आहे.
