SC On Shiv Sena : अवघ्या महाराष्ट्राचे डोळे लागून राहिलेल्या शिवसेना आणि ‘धनुष्यबाण’ चिन्हाच्या वादावरील सुनावणी आज पुन्हा एकदा लांबणीवर पडली आहे. सर्वोच्च न्यायालयातील व्यग्र वेळापत्रकामुळे आज या प्रकरणावर युक्तिवाद होऊ शकला नाही. आता या प्रकरणाचा फैसला शुक्रवारी, म्हणजेच २३ जानेवारी रोजी होणार आहे. योगायोगाने याच दिवशी शिवसेनाप्रमुख बाळासाहेब ठाकरे यांची जयंती असल्याने या सुनावणीला भावनिक महत्त्व प्राप्त झाले आहे.
सुनावणी लांबणीवर पडण्याचे नेमके कारण काय?
आज सर्वोच्च न्यायालयात अनेक महत्त्वाची प्रकरणे सुनावणीसाठी होती. त्यात शिवसेना आणि राष्ट्रवादीच्या वादाचे प्रकरण ३७ व्या क्रमांकावर होते. सुनावणी न होण्यामागे दोन मुख्य तांत्रिक कारणे समोर आली आहेत. सरन्यायाधीश सूर्य कांत आज केवळ दुपारी १ वाजेपर्यंतच नियमित खंडपीठाचे कामकाज पाहणार होते. दुपारनंतर सरन्यायाधीश ‘अरवली डोंगररांगा’ प्रकरणाशी संबंधित विशेष खंडपीठात व्यस्त राहणार असल्याने, शिवसेनेच्या सत्तासंघर्षाला पुरेसा वेळ देणे शक्य झाले नाही.
बाळासाहेबांच्या जयंतीदिनी ‘न्याय’ कुणाला?
आता शुक्रवारी सकाळी ११:०० वाजता सरन्यायाधीशांच्या खंडपीठासमोर या महायुद्धाला सुरुवात होईल. गेल्या ३ वर्षांपासून सुरू असलेला हा कायदेशीर लढा आता अंतिम टप्प्यात आल्याचे मानले जात आहे. ज्या बाळासाहेबांनी शिवसेनेची स्थापना केली, त्यांच्याच जयंती दिवशी पक्षाचे नाव आणि चिन्हावर कुणाची मोहोर उमटणार, याचा कायदेशीर फैसला होणार आहे. यामुळे ठाकरे आणि शिंदे या दोन्ही गटांच्या समर्थकांमध्ये धाकधूक वाढली आहे.
