Deepinder Goyal Resigns : कॉर्पोरेट विश्वातून एक मोठी बातमी समोर आली आहे. झोमॅटोची (Zomato) मुख्य कंपनी असलेल्या ‘इटरनल ग्रुप’चे (Eternal Group) संस्थापक दीपिंदर गोयल यांनी ग्रुप सीईओ पदावरून पायउतार होण्याचा निर्णय घेतला आहे. मात्र, ते कंपनीपासून दूर जाणार नसून भविष्यात बोर्डाचे ‘व्हाईस चेअरमन’ म्हणून काम पाहतील. अलबिंदर ढींडसा आता इटरनल ग्रुपचे नवीन ग्रुप सीईओ म्हणून धुरा सांभाळणार आहेत.
राजीनामा का दिला? काय आहे दीपिंदर गोयल यांचा प्लॅन?
स्वतः गोयल यांनी सोशल मीडिया प्लॅटफॉर्म ‘X’ वर पोस्ट करून या बदलाची कारणे स्पष्ट केली आहेत. गोयल यांना काही अशा व्यवसायांवर आणि कल्पनांवर काम करायचे आहे ज्यामध्ये जोखीम जास्त आहे. एका सार्वजनिक कंपनीच्या (Public Listed Company) सीईओ पदावर राहून असे धाडसी प्रयोग करणे तांत्रिकदृष्ट्या कठीण असते. सीईओ पदावर असलेल्या कायदेशीर आणि प्रशासकीय चौकटीमुळे त्यांची एकाग्रता विभागली जात होती. कंपनीमध्ये शिस्त आणि लक्ष केंद्रित राहण्यासाठी त्यांनी ही जबाबदारी सोपवली आहे. सीईओ पद सोडले तरी ते धोरणात्मक निर्णय, कंपनी संस्कृती आणि नेतृत्व विकासामध्ये सक्रिय राहतील.
अलबिंदर ढींडसांवर विश्वास; ‘बॅटल-हार्डन’ फाऊंडरकडे सूत्रे
नवीन सीईओ अलबिंदर ढींडसा यांच्याबद्दल बोलताना गोयल म्हणाले की, “ब्लिंकिटच्या (Blinkit) यशामध्ये अलबिंदर यांचा मोठा वाटा आहे. त्यांनी पुरवठा साखळी आणि कार्यप्रणाली अत्यंत मजबूत केली आहे.” ढींडसा यांच्या अंमलबजावणी क्षमतेमुळेच कंपनी आज ‘ब्रेकईवन’पर्यंत पोहोचू शकली, असेही त्यांनी नमूद केले.
१८ वर्षांचा प्रवास आणि भविष्यातील स्वप्न
दीपिंदर गोयल यांनी आपल्या आयुष्यातील निम्मी वर्षे म्हणजे १८ वर्षे ही कंपनी उभारण्यासाठी दिली आहेत. एका साध्या ‘मेन्यू स्कॅनिंग’ स्टार्टअपपासून सुरू झालेला हा प्रवास आज अब्जावधींच्या साम्राज्यापर्यंत पोहोचला आहे. “इटरनलला भारताची सर्वात मौल्यवान कंपनी बनवणे आणि एक अब्ज ग्राहकांपर्यंत पोहोचणे हेच माझे स्वप्न आहे,” असे भावूक उद्गार त्यांनी शेवटी काढले.
