Pune Mayor: पुणे महानगरपालिकेच्या निवडणुकीनंतर गेल्या दोन आठवड्यांपासून रंगलेल्या महापौरपदाच्या सस्पेन्सवर अखेर पडदा पडला आहे. अनुभवी चेहऱ्याला संधी देण्याच्या धोरणानुसार, भारतीय जनता पक्षाने मंजुषा नागपुरे यांच्या नावावर शिक्कामोर्तब केले आहे. मुख्यमंत्री देवेंद्र फडणवीस यांनी या नावावर अंतिम मोहोर उमटवली असून, यामुळे इच्छुकांच्या शर्यतीत असलेल्या इतर नावांना धक्का बसला आहे.
चुरशीची शर्यत
महापौरपदासाठी भाजपच्या कोअर कमिटीने वर्षा तापकीर, मानसी देशपांडे आणि मंजुषा नागपुरे या तीन अनुभवी नगरसेविकांच्या नावांची शिफारस केली होती. या तिघीही चौथ्यांदा निवडून आल्याने स्पर्धा अटीतटीची होती. सुरुवातीला वर्षा तापकीर यांचे नाव आघाडीवर असताना, अंतिम क्षणी भाजपने नागपुरे यांच्या नावाला पसंती देऊन राजकीय वर्तुळात धक्कातंत्राचा वापर केला आहे. मंजुषा नागपुरे यांच्या निवडीमुळे सिंहगड रोड परिसराला प्रथमच शहराचे प्रथम नागरिकपद भूषवण्याचा मान मिळणार आहे. विशेष म्हणजे, नागपुरे या यंदा बिनविरोध निवडून आल्या आहेत.
निवड बिनविरोध होणार?
पुणे महापालिकेत सध्याचे संख्याबळ पाहता, विरोधी पक्ष असलेल्या राष्ट्रवादी काँग्रेसने महापौरपदासाठी उमेदवार न उतरवण्याचे संकेत दिले आहेत. त्यामुळे ९ फेब्रुवारी रोजी होणाऱ्या पहिल्या सर्वसाधारण सभेत ही निवड केवळ औपचारिकता उरण्याची शक्यता आहे.
बैठकीत झाले निर्णय
सोमवारी भाजप प्रदेशाध्यक्ष रवींद्र चव्हाण आणि पुण्यातील कोअर कमिटीची महत्त्वाची बैठक पार पडली. या बैठकीत झालेल्या चर्चेनंतर अहवाल मुख्यमंत्र्यांकडे सोपवण्यात आला होता. ९ फेब्रुवारीला आवाजी मतदानाने ही प्रक्रिया पूर्ण होऊन पुणे शहराला अधिकृतपणे नवे महापौर मिळतील.
