Bharat Gogawale: उपमुख्यमंत्री अजित पवार यांच्या अकाली निधनानंतर राष्ट्रवादी काँग्रेसच्या रिक्त झालेल्या ‘राष्ट्रीय अध्यक्ष’ पदावरून महायुतीमध्ये जुंपली आहे. केंद्रीय मंत्री पियुष गोयल यांनी प्रफुल पटेल यांचे नाव अध्यक्ष म्हणून घेतल्याने नव्या वादाला तोंड फुटले आहे. यावरून शिवसेनेचे (शिंदे गट) प्रवक्ते भरत गोगावले यांनी राष्ट्रवादीचे प्रदेशाध्यक्ष सुनील तटकरे यांच्यावर निशाणा साधला आहे. “प्रफुल पटेलांचे नाव अनावधानाने आले, असे म्हणणे हा निव्वळ बनाव आहे. पडद्यामागे सूत्रे आधीच हाललेली असतात, तेव्हाच अशी नावे बाहेर येतात,” अशा शब्दांत गोगावलेंनी तटकरेंच्या स्पष्टीकरणाची लक्तरे वेशीवर टांगली आहेत.
‘मराठी चेहरा’ विरुद्ध ‘प्रफुल पटेल
प्रफुल पटेल यांच्या संभाव्य नियुक्तीवर मनसे प्रमुख राज ठाकरे यांनी ‘राष्ट्रवादीचा अध्यक्ष पटेल नसावा तर पाटील असावा’ अशी रोखठोक भूमिका मांडली होती. या पार्श्वभूमीवर तटकरे यांनी पियुष गोयल यांच्या विधानाला ‘चूक’ ठरवण्याचा प्रयत्न केला. मात्र, भरत गोगावले यांनी यावर सडकून टीका करताना म्हटले की, अजित दादांच्या निधनाला अजून १२ दिवसही उलटले नाहीत, तोवर ही मंडळी पदांच्या वाटण्या आणि नावांच्या घोषणांमध्ये मग्न आहेत. यातून त्यांनी राष्ट्रवादीच्या नेत्यांच्या घाईबद्दल तीव्र नाराजी व्यक्त केली आहे.
दरम्यान, सुनील तटकरे आणि भरत गोगावले यांच्यातील परंपरागत राजकीय वैर आता जिल्हा स्तरावरून राज्य स्तरावर आले आहे. निमित्त जरी अध्यक्षपदाचे असले, तरी मूळ संघर्ष रायगडच्या वर्चस्वाचा असल्याचे राजकीय विश्लेषकांचे मत आहे. आज इंदापूर येथे जिल्हा परिषद निवडणुकीच्या प्रचारासाठी सुनील तटकरे यांची जाहीर सभा होत आहे. अजित दादांच्या निधनानंतरची ही त्यांची पहिलीच राजकीय सभा असल्याने, ते गोगावलेंच्या या विधानावर काय पलटवार करतात, याकडे संपूर्ण राजकीय वर्तुळाचे लक्ष लागले आहे.
