Supriya Sule: राष्ट्रवादी काँग्रेसच्या (शरद पवार गट) खासदार सुप्रिया सुळे यांनी आज दिल्लीत माध्यमांशी बोलताना राजकीय गौप्यस्फोटांसोबतच आपल्या कौटुंबिक आयुष्यातील एक महत्त्वाची बातमी शेअर केली. आपल्या मुलीचे लग्न जमल्याची माहिती देताना त्यांना दिवंगत बंधू अजित पवार यांची प्रकर्षाने आठवण झाली. “आज दादा असता, तर त्यानेच ही आनंदवार्ता सर्वांना सांगितली असती,” अशा शब्दांत त्यांनी आपल्या भावना व्यक्त केल्या.
विलीनीकरणाचे गुपित आणि दादांशी झालेली चर्चा
दोन्ही राष्ट्रवादी पक्षांच्या एकत्र येण्याबाबत गेल्या अनेक दिवसांपासून चर्चा सुरू आहेत. यावर पडदा उचलताना सुळे म्हणाल्या, “विलीनीकरणाच्या मुद्द्यावर माझ्या आणि अजितदादांमध्ये सविस्तर संवाद झाला होता. आमच्यात नेमकी काय चर्चा झाली, हे दादांना माहित होतं. मी यावर बोललेले अनेकांना आवडत नसले, तरी ते नाकारता न येणारे वास्तव आहे.”
पालकमंत्रीपदी सुनेत्रा पवार
दरम्यान, पुणे जिल्ह्याच्या पालकमंत्री म्हणून सुनेत्रा पवार यांच्या झालेल्या नियुक्तीवर सुप्रिया सुळे यांनी अत्यंत संवेदनशील प्रतिक्रिया दिली. “सुनेत्रा वहिनींनी ही जबाबदारी स्वीकारल्याचा मला अभिमान आणि आनंद आहे. मात्र, हे सर्व पाहण्यासाठी दादा आज आपल्यात नाहीत, याचे शल्यही मोठे आहे. माझी स्थिती सध्या ‘एका डोळ्यात अश्रू आणि एका डोळ्यात आनंद’ अशी आहे,” असे त्या म्हणाल्या.
