Bacchu Kadu : महाराष्ट्राच्या राजकीय वर्तुळात मुख्यमंत्रीपदाबाबत पुन्हा एकदा चर्चांना उधाण आले आहे. शिवसेनेचे विधान परिषद सदस्य बच्चू कडू यांनी उपमुख्यमंत्री एकनाथ शिंदे यांच्याबाबत मोठं वक्तव्य केलं आहे.
पंढरपूर येथे विठ्ठल दर्शनासाठी आले असताना माध्यमांशी बोलताना बच्चू कडू म्हणाले की, “आज जर महाराष्ट्रात सर्व्हे केला, तर मुख्यमंत्रीपदासाठी एकनाथ शिंदे यांनाच सर्वाधिक पसंती मिळेल. ते नेहमीच सर्वसामान्य जनतेशी जोडलेले आहेत, त्यामुळे मलाच नाही तर अनेकांना ते मुख्यमंत्री व्हावेत असे वाटते.” त्यांच्या या वक्तव्यानंतर राज्याच्या राजकारणात नव्या चर्चांना सुरुवात झाली आहे.
दरम्यान, राजू शेट्टी यांच्या नेतृत्वाखाली मुंबईत झालेल्या शेतकरी आंदोलनादरम्यान पोलिसांनी केलेल्या कारवाईवरही बच्चू कडू यांनी प्रतिक्रिया दिली. त्यांनी या कारवाईचा निषेध करत संबंधित पोलीस अधिकाऱ्यांना तातडीने निलंबित करण्याची मागणी केली. तसेच आपण राजू शेट्टी आणि महादेव जानकर यांच्या भूमिकेला समर्थन देत असल्याचेही त्यांनी स्पष्ट केले.
त्याचबरोबर मनोज जरांगे पाटील यांच्या आंदोलनावर बोलताना बच्चू कडू यांनी सांगितले की, “आपण आता कोणत्याही जातीपातीच्या आंदोलनात सहभागी होणार नाही. शेतकरी आणि दिव्यांग हे सर्व समाजात असल्याने व्यापक दृष्टीकोनातूनच आपण पुढे काम करणार आहोत.”
