कोल्हापूर : करवीर तालुक्यातील दर्याचे वडगाव येथे रविवारी रात्री घडलेल्या दुर्दैवी अपघाताने परिसर हळहळला आहे. डोळ्यात कचरा गेल्याने दुचाकीवरील नियंत्रण सुटून मोपेड थेट विहिरीत कोसळली. या दुर्घटनेत ३० वर्षीय मयुरी बेनके यांचा बुडून मृत्यू झाला, तर त्यांचे पती विशाल बेनके थोडक्यात बचावले.
डॉक्टरांकडे जात असताना घडला अपघात
मयुरी बेनके यांची प्रकृती ठीक नसल्याने त्या रविवारी रात्री पतीसोबत गावातील डॉक्टरांकडे जात होत्या. रात्री सुमारे आठ वाजण्याच्या सुमारास त्या स्वतः मोपेड चालवत घराबाहेर पडल्या होत्या.
घरापासून काही अंतरावर असताना अचानक वाऱ्याने उडालेला कचरा मयुरी यांच्या डोळ्यात गेला. त्यामुळे मोपेडवरील त्यांचा ताबा सुटला आणि दुचाकी रस्त्यालगतच्या विहिरीत कोसळली.
अंधारामुळे बचावकार्य कठीण
विहीर खोल आणि परिसरात अंधार असल्याने विशाल बेनके यांना पत्नीचा शोध घेणे कठीण झाले. त्यांनी पत्नीला वाचवण्याचा प्रयत्न केला, मात्र यश आले नाही. त्यानंतर त्यांनी आरडाओरडा करत ग्रामस्थांना मदतीसाठी बोलावले.
ग्रामस्थांनी काढला मृतदेह
घटनेची माहिती मिळताच गावातील युवक आणि ग्रामस्थांनी तातडीने घटनास्थळी धाव घेतली. रूपेश बेनके आणि त्यांच्या सहकाऱ्यांनी विहिरीत उतरून मयुरी यांचा मृतदेह बाहेर काढला. त्यानंतर शवविच्छेदनासाठी मृतदेह सीपीआर रुग्णालयात पाठवण्यात आला.
दोन मुलींसह कुटुंबावर दु:खाचा डोंगर
मयुरी यांच्या पश्चात पती, दोन लहान मुली, सासू-सासरे आणि दीर असा परिवार आहे. एका क्षणात संपूर्ण कुटुंबावर दु:खाचा डोंगर कोसळला आहे.
विहिरीभोवती सुरक्षेची मागणी
या दुर्घटनेनंतर ग्रामस्थांनी रस्त्यालगतच्या विहिरींवर सुरक्षेची व्यवस्था करण्याची मागणी केली आहे. संबंधित घटनेची नोंद इस्पुर्ली पोलीस ठाण्यात करण्यात आली असून पुढील तपास सुरू आहे.
