Local Body Elections: विधानसभा निवडणुकीनंतर आता राज्यभरातील स्थानिक स्वराज्य संस्थांच्या निवडणुकीची उत्सुकता वाढली आहे. डिसेंबरमध्ये या निवडणुका होण्याची शक्यता व्यक्त केली जात असून सर्वच राजकीय पक्षांनी जोरदार तयारीला सुरुवात केली आहे. महायुती आणि महाविकास आघाडीतील पक्ष एकत्र लढणार की स्वतंत्रपणे रिंगणात उतरणार? याकडे सर्वांचे लक्ष लागले आहे.
दरम्यान, राष्ट्रवादी काँग्रेसच्या अजित पवार गटाचे खासदार प्रफुल्ल पटेल यांनी महत्त्वपूर्ण भूमिका स्पष्ट केली आहे. त्यांनी सांगितले की, मुंबईतील निवडणुकीत महायुतीसोबत स्पर्धा करण्याचा विचार सुरू आहे, मात्र उर्वरित महाराष्ट्रात राष्ट्रवादी स्वबळावर उमेदवार उभे करेल. स्थानिक नेत्यांना ठरवायचे असेल तर त्यांनी इतर पक्षांशी युती केली तरी आम्ही त्यात हस्तक्षेप करणार नाही, असे पटेल यांनी सांगितले. तसेच, मेघालय, मणिपूर आणि बिहारसह अनेक राज्यांमध्येही पक्ष राष्ट्रीय स्तरावर आपली उपस्थिती दाखवेल, असंही प्रफुल्ल पटेल यांनी यावेळी नमूद केलं.
विदर्भातील राजकारणावर भाष्य करताना प्रफुल्ल पटेल यांनी पालकमंत्र्यांना थेट सुनावले. विदर्भात फक्त पर्यटक म्हणून येण्याची गरज नाही. कार्यकर्त्यांच्या प्रश्नांवर तोडगा काढण्यासाठी ठोस प्रयत्न झाले पाहिजेत. नाहीतर दोन तास जिल्ह्यात येऊन फक्त दौरा करून परत जाण्याला काही अर्थ नाही, असंही पटेल यांनी म्हटलं.
पालकमंत्र्यांचे कामकाज पक्षाच्या विस्ताराला पूरक ठरले पाहिजे, असा स्पष्ट इशारा देत प्रफुल्ल पटेल म्हणाले की, ‘मंत्री कार्यकर्त्यांसोबत समन्वय साधून काम करायला हवे. अन्यथा आमच्या पक्षाचा पाया कमकुवत राहील. अजूनही अनेक ठिकाणी आमच्या मंत्र्यांकडून संघटन बळकट करण्याकडे पुरेसे लक्ष दिले जात नाही.’
