Sarasbaug Mahalaxmi Temple: पुणे शहरातील सारसबाग परिसरातील श्री महालक्ष्मी मंदिरात दरवर्षीप्रमाणे यंदाही दसऱ्याच्या दिवशी श्री महालक्ष्मी देवीला सोन्याची साडी परिधान करण्यात आली. तब्बल 16 किलो वजनाची ही साडी दक्षिण भारतातील कारागिरांनी सहा महिन्यांच्या मेहनतीनंतर साकारली असून, तिच्यावर नाजूक नक्षीकाम केलेले आहे. श्री बन्सीलाल रामनाथ अग्रवाल धार्मिक व सांस्कृतिक ट्रस्टच्या माध्यमातून ही परंपरा दरवर्षी जपली जाते.
देवीला ही सोन्याची साडी दरवर्षी दोनदा – दसरा आणि लक्ष्मीपूजनाच्या दिवशी नेसवली जाते. भक्तांनी अर्पण केलेली ही साडी मंदिर प्रशासनाच्या देखरेखीखाली देवीला परिधान केली जाते. इतिहासातील परंपरेनुसार, दसऱ्याच्या दिवशी सोन्याचे महत्त्व विशेष मानले जाते. प्राचीन काळात या दिवशी सोने लुटण्याची परंपरा होती. त्याचेच स्मरण म्हणून श्री महालक्ष्मी देवीला सोन्याची साडी नेसवली जाते, अशी माहिती मंदिर विश्वस्तांनी दिली.
हेही वाचा – Dasara Melava: दसरा मेळाव्याला ठाकरे बंधू पुन्हा एकत्र येणार? राजकीय चर्चांना उधाण
दरम्यान, साडीतील आकर्षक नक्षीकाम आणि चमकदार सुवर्णधाग्यांमुळे देवीचे रुप अधिकच मनमोहक दिसत आहे. सोन्याच्या साडीत सजलेली श्री महालक्ष्मी देवीची झलक पाहण्यासाठी भाविकांनी मोठी गर्दी केली. ही सोन्याची साडी एका भक्ताने देवीला अर्पण केली आहे. तब्बल 16 किलो वजनाच्या या साडीला साकारण्यासाठी सुमारे सहा महिने लागले.
साडीच्या निर्मितीसाठी विशेष कौशल्य असलेल्या दक्षिण भारतीय कारागिरांची मदत घेण्यात आली होती. दरवर्षीप्रमाणे यंदाही देवीचे सुवर्णवस्त्रातील दर्शन घेण्यासाठी मंदिर परिसरात उत्सवी वातावरण पाहायला मिळाले. दिवसभर देवीच्या दर्शनासाठी रांगा लागल्या होत्या. श्रद्धा, भक्ती आणि सोनेरी सजावटीची ही सांगड पुणेकरांसाठी आकर्षणाचा विषय ठरली आहे.
