Dasara Melava 2025: राज्यातील आगामी महापालिका निवडणुकांच्या पार्श्वभूमीवर ठाकरे बंधू पुन्हा एकत्र येणार का, याबाबत चर्चांना वेग आला आहे. शिवसेनेचा पारंपरिक दसरा मेळावा 2 ऑक्टोबरला शिवतीर्थावर पार पडणार आहे. या मेळाव्याला मनसे अध्यक्ष राज ठाकरे हजेरी लावणार का, त्यांना निमंत्रण दिले जाणार का आणि या व्यासपीठावर युतीसंदर्भात घोषणा होणार का? अशा अनेक तर्कांना उधाण आले आहे.
गेल्या काही महिन्यांपासून दोन्ही भावांची भेटीगाठी वाढल्याने या चर्चेला अधिक चालना मिळाली आहे. आधी मराठीच्या मुद्द्यावर झालेल्या मेळाव्यात दोघे एकत्र दिसले होते. त्यानंतर राज ठाकरे मातोश्रीवर जाऊन उद्धव ठाकरे यांना वाढदिवसाच्या शुभेच्छा देऊन आले, तर उद्धव ठाकरे देखील शिवतीर्थ बंगल्यावर गणेशोत्सवाला गेले होते. या घडामोडींमुळे ठाकरे बंधूंच्या युतीचे संकेत मिळत असल्याची चर्चा सध्या राजकीय वर्तुळात सुरू आहे.
हेही वाचा – Shiv Sena : शिवसेना ठाकरे गटाच्या दसरा मेळाव्यात राज ठाकरेंचीही तोफ धडाडणार? मोठी अपडेट समोर
दरम्यान, शिवसेनेचा दसरा मेळावा 58 वर्षांची परंपरा जपत दरवर्षी होत आला आहे. यापूर्वी दिवंगत बाळासाहेब ठाकरे या व्यासपीठावरून शिवसैनिकांना विचारांचे सोनं वाटायचे. सध्या उद्धव ठाकरे पक्षप्रमुख म्हणून हे कार्य करत आहेत. त्यामुळे या मेळाव्यात राज ठाकरे सहभागी होतील की नाही, याबाबत अनिश्चितता असली तरी दोन भावांची भेट दसऱ्याच्या निमित्ताने होण्याची शक्यता संजय राऊत यांनी सूचित केली आहे. मात्र अंतिम निर्णय राज ठाकरे यांच्यावर सोडण्यात आला आहे.
याशिवाय, दसरा मेळाव्याच्या व्यासपीठावरून शिवसेना महापालिका निवडणुकीच्या प्रचाराचा प्रारंभ करणार आहे. उद्धव ठाकरे आपल्या भाषणातून मनसेसोबतच्या युतीबाबत संकेत देतात का? याकडे सर्वांचे लक्ष असेल. या राजकीय चर्चेतून युतीचा मुहूर्त साधला जाईल का? की फक्त कौटुंबिक भेटींवरच ठाकरे बंधू एकत्र दिसतील, हे दसऱ्यादिवशी स्पष्ट होणार आहे.
