ST Bus Fare Increase: राज्य परिवहन महामंडळाच्या लाल परीमध्ये प्रवास करणाऱ्या प्रवाशांना यंदाच्या दिवाळीत जास्त खर्च करावा लागणार आहे. महामंडळाने पुन्हा एकदा भाडेवाढ करण्याचा निर्णय घेतला असून, 15 ऑक्टोबर ते 5 नोव्हेंबर या कालावधीत ही वाढ लागू होणार आहे. दरवाढीचा परिणाम थेट लाखो प्रवाशांच्या खिशावर होणार आहे. दिवाळीच्या काळात गावाकडे जाणाऱ्यांसाठी एसटी बस हा प्रमुख आधार मानला जातो. मात्र, यंदा सुरक्षित मानला जाणारा हा प्रवास महाग होणार आहे.
शिवनेरी आणि शिवाई वगळता सर्व बसेसवर भाडेवाढ –
महामंडळाच्या निर्णयानुसार, वातानुकूलित शिवनेरी आणि शिवाई गाड्यांना वगळता सर्व बसेसवर 10 टक्के दरवाढ लागू करण्यात आली आहे. उदाहरणार्थ, ज्या प्रवासाचे भाडे 100 रुपये होते, तिथे आता प्रवाशांना 110 द्यावे लागणार आहेत.
सर्वसामान्यांच्या खिशाला कात्री
एसटी बसमधून गावोगावी, तसेच रातराणी गाड्यांतून लांब पल्ल्याचा प्रवास करणाऱ्या सर्वसामान्य प्रवाशांवर या निर्णयाचा परिणाम होणार आहे. आधीच अतिवृष्टीमुळे शेतकरी अडचणीत असताना दिवाळीपूर्वीच प्रवास महागल्याने सर्वसामान्यांची चिंता वाढली आहे.
हेही वाचा – सरकारची मोठी घोषणा! ओला दुष्काळाच्या सर्व सवलती लागू; दिवाळीपूर्वी शेतकऱ्यांना थेट मदत मिळणार
गेल्या वर्षीही एसटीच्या भाडेवाढीचा फटका बसला होता. 24 जानेवारी 2025 पासून लागू करण्यात आलेल्या निर्णयानुसार, राज्य परिवहन प्राधिकरणाच्या बैठकीत तब्बल 14.95 टक्के तिकीट दरवाढीला मंजुरी देण्यात आली होती. त्यामुळे, सलग दुसऱ्या वर्षी प्रवाशांना महागड्या प्रवासाचा सामना करावा लागत आहे.
