Pimpri Chinchwad Murder: पिंपरी-चिंचवडमध्ये घडलेल्या नकुल भोईर खून प्रकरणाने नाट्यमय वळण घेतलं आहे. सुरुवातीला घरगुती वाद म्हणून समोर आलेल्या या घटनेचा आता प्रेम आणि सूड या दुहेरी कारणांशी संबंध असल्याचं पोलीस तपासात उघड झालं आहे. चिंचवड पोलिसांनी नकुल भोईरची पत्नी चैताली भोईरचा कथित प्रियकर सिद्धार्थ पवार याला अटक केली आहे. तपासात समोर आलं आहे की चैताली आणि सिद्धार्थ यांच्यात गुप्त प्रेमसंबंध होते, आणि नकुल या नात्याला कडाडून विरोध करत होता. त्यामुळे पती-पत्नीमध्ये सातत्याने वाद सुरू होते.
वादातून खुनाकडे प्रवास
पोलीस सूत्रांच्या माहितीनुसार, नकुलला चैतालीने कर्ज घेतल्याचं समजल्यावर त्यांच्या नात्यातील तणाव आणखी वाढला. अशाच एका वादात, सिद्धार्थच्या उपस्थितीत नकुलने चैतालीवर हल्ला केला. यामुळे संतप्त झालेल्या चैताली आणि सिद्धार्थने नकुलचा खून करण्याचा कट रचला. त्यानंतर त्यांनी एकत्र येऊन दुपट्ट्याने गळा आवळून नकुलचा खून केला, अशी प्राथमिक माहिती पोलीस तपासात समोर आली आहे.
हेही वाचा – Phaltan Crime: फलटण डॉक्टर आत्महत्या प्रकरणात नवा खुलासा! शवविच्छेदन अहवाल पोलिसांच्या हाती
पोलिसांचा तपास सुरु
चिंचवड पोलिसांनी सिद्धार्थ पवारला अटक करून खुनामागचा हेतू, नियोजन आणि संपूर्ण घटनाक्रम शोधण्याचा तपास सुरू केला आहे. या प्रकरणातील आणखी काही धक्कादायक बाबी पुढील तपासात उघड होण्याची शक्यता आहे. या घटनेमुळे पिंपरी-चिंचवड परिसरात मोठी खळबळ उडाली आहे. सुरुवातीला हे प्रकरण केवळ घरगुती वादाचे वाटत असले तरी, आता ते प्रेम आणि पैशाच्या वादातून जन्मलेल्या खुनात परिवर्तित झालं आहे.
