कोल्हापूर : खासगी इंग्रजी माध्यमाच्या शाळांत मोफत प्रवेश सुविधा देणारी आरटीईची प्रवेश प्रक्रिया यंदा १८ डिसेंबरला शाळा नोंदणीपासून सुरू झाली. जानेवारी महिन्यात विद्यार्थी नोंदणीला सुरुवात होईल, तर मार्च महिन्यात प्रवेशासाठीची लॉटरी जाहीर होईल. यंदा पहिल्यांदाच जून-जुलै महिन्यांत संपूर्ण प्रवेश प्रक्रिया पूर्ण होईल. त्यामुळे नियमित वेळेत आरटीईअंतर्गत प्रवेशित विद्यार्थ्यांचे वर्गही सुरू होऊ ठेवले जाऊ शकतील.
बालकांचा मोफत शिक्षण हक्क कायद्यांतर्गत विशेषकरून इंग्रजी माध्यमाच्या शाळांमध्ये २५ टक्के जागा राखीव जातात. या सर्व जागांवर आरक्षित प्रवर्ग, तसेच आर्थिक दुर्बल घटकांतील विद्यार्थ्यांच्या प्रवेशासाठी आरटीई प्रवेश प्रक्रिया ऑनलाईन राबवली जाते. यासंदर्भात शासनाकडे पाठवलेल्या प्रस्तावाला मंजुरी दिली आहे. त्यामुळे १८ डिसेंबरपासून शाळा नोंदणीला सुरुवात झाली आहे. यापूर्वी ही प्रक्रिया सुरू व्हायलाच फेब्रुवारी-मार्च उजडायचा. यावेळी मात्र मार्च महिन्यात विद्यार्थ्यांची निवड यादी जाहीर करण्याचे तसेच जून-जुलै महिन्यांतच प्रक्रिया पूर्ण करण्याचे नियोजन केल्याचे शिक्षण संचालक शरद गोसावी यांनी पत्राद्वारे कळवले आहे.
