Priyanshu Kshatriya Murder: नागपूरमध्ये ‘झुंड’ चित्रपटात अभिनय केलेल्या प्रियांशू क्षत्रिय उर्फ बाबू छत्रीच्या हत्येने चित्रपटसृष्टी हादरली आहे. नागराज मंजुळे दिग्दर्शित या चित्रपटात अमिताभ बच्चन यांच्यासोबत पडद्यावर झळकलेल्या या अभिनेत्याचा दुर्दैवी शेवट झाला आहे. मिळालेल्या माहितीनुसार, जरीपटका परिसरात प्रियांशूचा त्याचा मित्र ध्रुव साहू याच्यासोबत वाद झाला. दारूच्या नशेत झालेल्या या वादात ध्रुवने रागाच्या भरात धारदार शस्त्राने वार करत प्रियांशूला गंभीर जखमी केले. त्यानंतर त्याला मेयो रुग्णालयात दाखल करण्यात आले, मात्र डॉक्टरांनी तपासणीअंती त्याला मृत घोषित केले. पोलिसांनी आरोपी ध्रुव साहूला अटक केली आहे.
दरम्यान, घटनास्थळी पोलीस दाखल झाले तेव्हा बाबू छत्री अर्धनग्न अवस्थेत प्लॅस्टिकमध्ये गुंडाळलेला आढळला. स्थानिकांना आरडाओरडा ऐकू आल्यानंतर त्यांनी पोलिसांना माहिती दिली. प्राथमिक चौकशीत बाबू छत्रीवर यापूर्वीही काही गुन्हे दाखल असल्याचे उघड झाले आहे.‘झुंड’ चित्रपटातील त्याच्या नैसर्गिक अभिनयाने तो प्रेक्षकांच्या लक्षात राहिला होता. नागराज मंजुळे यांनी नागपूरमधील स्थानिक तरुणांना घेऊन हा चित्रपट साकारला होता. त्यावेळी बाबूची निवड झाल्याने अनेकांना आश्चर्य वाटले होते.
तथापी, एका मुलाखतीत बाबू छत्रीने सांगितले होते की, तो रेल्वे ट्रॅकजवळच्या वस्तीत वाढला. लहानपणी तो कोळसा गोळा करून विकायचा. त्याच्या नैसर्गिक बोलण्यात आणि व्यक्तिमत्त्वात काहीतरी वेगळं पाहून नागराज मंजुळे यांनी त्याला संधी दिली होती. या घटनेने ‘झुंड’ चित्रपटातील सहकलाकार आणि चाहत्यांमध्ये शोककळा पसरली आहे. नागपूर पोलिसांनी प्रकरणाची चौकशी सुरू केली असून, हत्येचं नेमकं कारण काय हे समजण्यासाठी पुढील तपास सुरू आहे.
