Pune Crime: पोलीस दलात भरती होऊन देशसेवा करण्याचे स्वप्न पाहणाऱ्या एका तरुणाचा दुर्दैवी अंत झाल्याची हृदयद्रावक घटना शिरूर तालुक्यातील शिक्रापूर येथे घडली आहे. सातारा जिल्ह्यातील रहिवासी असलेल्या २२ वर्षीय विरू काळे याने पोलीस भरती प्रक्रियेसाठी पुण्यात आलेला असताना मित्राच्या खोलीवर गळफास घेऊन आपली जीवनयात्रा संपवली.
नेमकी घटना काय?
सातारा जिल्ह्यातील सैदापूर (ता. जि. सातारा) येथील रहिवासी असलेला विरू संजय काळे हा तरुण पोलीस भरतीसाठी पुण्यात आला होता. शिक्रापूर येथील मित्र रणजीत साळुंखे आणि आदित्य साळेकर यांच्यासोबत तो गेल्या दोन दिवसांपासून एका खोलीवर वास्तव्यास होता. सर्व मित्र मिळून परीक्षेची तयारी करत होते. मात्र, सायंकाळच्या सुमारास मित्रांची नजर चुकवून विरूने खोलीत दोरीने गळफास घेतला.
हेही वाचा – Pune Cycling Tour Accident: पुणे ग्रँड सायकल टूरमध्ये अपघात, 70 हून अधिक सायकलपटू एकमेकांवर आदळून जखमी
पोलीस कारवाई आणि तपास
विरूला तातडीने रुग्णालयात हलवण्यात आले, मात्र तिथे त्याला मृत घोषित करण्यात आले. या घटनेची माहिती मिळताच शिक्रापूर पोलिसांनी घटनास्थळी धाव घेतली. या प्रकरणी शिक्रापूर पोलीस ठाण्यात अकस्मात मृत्यूची (ADR) नोंद करण्यात आली आहे. हवालदार बापू हाडगळे या प्रकरणाचा तपास करत आहेत. विरूने एवढ्या टोकाचे पाऊल का उचलले? त्याच्यावर काही मानसिक दडपण होते का? याचा शोध पोलीस घेत आहेत.
