महाराष्ट्र जागरण डेस्क: आशियामधील सर्वात श्रीमंत समजल्या जाणाऱ्या भारतातील मानाच्या बृहन्मुंबई महानगरपालिकेच्या सहकार्याने ‘आता थांबायचं नाय’ हा ‘झी स्टुडिओज’चा आगामी मराठी चित्रपट प्रेक्षकांच्या भेटीला येतोय. अभिनेते भरत जाधव, सिद्धार्थ जाधव, ओम भूतकर, श्रीकांत यादव, पर्ण पेठे, प्रवीणकुमार डाळिंबकर, प्राजक्ता हनमघर, किरण खोजे आणि आशुतोष गोवारीकर अशी तगडी स्टारकास्ट सिनेमात आहे.
पहिल्यांदाच हे सर्व दिग्गज कलाकार एकत्र आल्याने या चित्रपटाची कथा काय असणार यांचे औत्सुक्य प्रेक्षकांमध्ये नक्कीच आहे. नुकताच या सिनेमाचा मुहूर्त संपन्न झाल्यानंतर लगेचच चित्रीकरणास सुरुवात करण्यात आली. यावेळी मुंबई नगरपालिका आयुक्त भूषण गगराणी, महापालिका उपायुक्त किरण दिघावकर, झी स्टुडिओजचे चीफ बिझनेस ऑफिसर उमेश के बन्सल, झी स्टुडिओजचे बिझनेस हेड बवेश जानवलेकर, निर्माते निधी परमार हिरानंदानी, धरम वालीया, क्रिएटिव्ह प्रोड्युसर तुषार हिरानंदानी, निवृत्त सनदी मनपा अधिकारी उदयकुमार शिरुरकर या मान्यवरांसह चित्रपटातील मुख्य कलाकार आणि तंत्रज्ञ उपस्थित होते.
मराठी चित्रपटविश्वात एका कर्तबगार आणि संवेदनशील अधिकाऱ्यांसंबंधीची ही सत्यकथा नक्कीच वेगळी ठरणार असल्याची खात्री निर्मात्यांना आहे. मुंबई महानगरपालिकेतील कर्मचाऱ्यांच्या आयुष्यात तेजाचा किरण आणणाऱ्या एका व्यक्तिमत्त्वाचा प्रवास मांडण्याची संधी मिळणं, ही गोष्ट ‘झी स्टुडिओज’ साठी अत्यंत भाग्याची आहे. मराठीत येणारा एक वेगळा आणि प्रेरणादायी सिनेमा पाहणं, ही एक पर्वणीच ठरणार आहे, असे झी स्टुडिओजचे चीफ बिझनेस ऑफिसर उमेश के बन्सल यांनी म्हटले.
