मुंबई : बॉलिवूडमधील अनेक सिनेमांमध्ये विनोदी कलाकाराची भूमिका साकारणारे राजपाल यादव हे सध्या आर्थिक गोष्टींमुळे चर्चेत आहे. त्यांनी दिलेला चेक बाऊन्सप्रकरणी त्यांना अटक करण्यात आली. फक्त राजपाल यादवच नाहीतर अनेक असे कलाकार होते त्यांना अशाप्रकारे आर्थिक अडचणींचा सामना करावा लागला.
अनेक स्टार्स लाखोंचे मालक असूनही ऐषोआरामाचे जीवन जगतात, पण नशिबाचे चाक कोणत्याही क्षणी फिरू शकते. बॉलिवूडमधील काही प्रसिद्ध व्यक्तिमत्त्वांसोबतही असेच घडले. हे चांगली कमाई करणारे स्टार्स अचानक दिवाळखोर झाले. राजपाल यादव सध्या तिहार तुरुंगात आहे. त्यांना चेक बाउन्स प्रकरणात तुरुंगवास भोगावा लागला आहे. त्याने एका चित्रपटासाठी ५ कोटी रुपये उधार घेतले होते. जेव्हा चित्रपट फ्लॉप झाला तेव्हा त्याला मोठे नुकसान सहन करावे लागले आणि तो पैसे परत करू शकला नाही.
हिरो नंबर वन म्हणून ओळखला जाणारा गोविंदा ९० च्या दशकातील टॉप स्टार राहिला. त्याने एकामागून एक हिट चित्रपट दिले. त्याच्या कॉमिक टायमिंग, डान्स मूव्हज आणि किलर एक्सप्रेशन्समुळे तो चाहत्यांचा आवडता झाला. पण नंतर, त्याचे नशीब अचानक वळले.
जेव्हा गोविंदाने राजकारणात येण्यासाठी चित्रपटांपासून दूर जाण्याचा निर्णय घेतला तेव्हा त्याची कारकीर्द अडचणीत आली. त्याने काही चित्रपटांची निर्मिती केली, ज्यामध्ये त्याचे मोठे नुकसान झाले. गोविंदाने एका मुलाखतीत कबूल केले की त्याला खर्च भागवण्यासाठी त्याची मालमत्ता विकावी लागली. तो आर्थिकदृष्ट्या अडचणीत होता.
