मुंबई : अर्चना पूरण सिंग आणि तिचे पती परमीत सेठी सध्या चर्चेत आहे. कारण, अर्चना यांच्या मुलांची पहिली कमाई हाती आली. यातील विशेष बाब म्हणजे या पैशांतून या मुलांनी बिझनेस क्लासमधील तिकीटाची खरेदी केली. या गोष्टीमुळे अर्चना आणि परमीत हे दोघेही अत्यंत खूश झाले. त्यांनी मुलाचे कौतुकही केले.
अर्चना आणि त्यांच्या कुटुंबियांनी YouTube व्लॉगमध्ये, स्वित्झर्लंडच्या त्यांच्या सहलीची झलक शेअर केली. अर्चनाने आयुष्यात खूप ऐषोआराम अनुभवला असला तरी त्यांनी मुलांना त्यापासून दूर ठेवले. अर्चनाच्या मुलांनी पहिल्यांदाच बिझनेस क्लासमध्ये प्रवास केला. तिने व्लॉगमध्ये याचे कारण देखील स्पष्ट केले. अर्चना आणि परमीत १९९० च्या दशकापासून सुप्रसिद्ध अभिनेते आहेत आणि इतक्या वर्षांपासून इंडस्ट्रीत चांगले काम करत आहेत. त्यांच्या मुलांसाठी त्यांचा एक कडक नियम होता, ते त्यांच्या पालकांसोबत स्वतःची तिकिटे खरेदी करण्याइतके मोठे होईपर्यंत बिझनेस क्लासमध्ये प्रवास करणार नाहीत.
स्वित्झर्लंडची ही सहल त्यांच्या मुलांनी बिझनेस क्लासमध्ये प्रवास करण्याची पहिलीच वेळ होती. व्हिडिओमध्ये अर्चनाचा मुलगा आयुष्मानने खुलासा केला की तो आणि आर्यमन पहिल्यांदाच बिझनेस क्लासमध्ये प्रवास करत आहेत. कारण, ही त्यांच्या आयुष्यातील पहिली कमाई आहे. यातूनच त्यांनी विमानातून प्रवास केला.
