Katrina Kaif Vicky Kaushal Baby Name: बॉलिवूडचे लाडके जोडपे कतरिना कैफ आणि विकी कौशल यांनी अखेर आपल्या चाहत्यांना आनंदाची बातमी दिली आहे. आई-बाबा झाल्यानंतर दोन महिन्यांनी त्यांनी आपल्या पहिल्या मुलाचे नाव सोशल मीडियाद्वारे जाहीर केले आहे. त्यांनी आपल्या लाडक्या लेकाचे नाव ‘विहान कौशल’ असे ठेवले असून, पहिल्यांदाच त्याच्या लहान हातांचा एक गोंडस फोटो शेअर केला आहे. ‘आमचा विहान म्हणजे प्रकाशाचा किरण आहे, ज्याने आमचे जग एका क्षणात बदलून टाकले,’ अशा भावनिक शब्दांत कतरिनाने आपली कृतज्ञता व्यक्त केली आहे.
विहान नावाचा अर्थ आणि संस्कृत कनेक्शन
कतरिनाने शेअर केलेल्या फोटोमध्ये विकी कौशलने कतरिना आणि विहानचा हात आपल्या हातात धरल्याचे दिसत आहे. ‘विहान’ हे नाव सध्या सोशल मीडियावर चर्चेचा विषय ठरले आहे. ‘विहान’ या शब्दाची उत्पत्ती संस्कृत आणि हिंदी भाषेतून झाली असून, त्याचा अर्थ अत्यंत सकारात्मक आहे. विहान म्हणजे ‘सकाळचा पहिला प्रकाश’, ‘दिवसाचा पहिला किरण’ किंवा ‘प्रकाश आणणारा’. कतरिनाने आपल्या कॅप्शनमध्ये ‘प्रार्थनांचे उत्तर मिळाले, जीवन सुंदर आहे,’ असे लिहीत आपल्या मुलाला ‘प्रकाशाचा किरण’ असे संबोधले आहे.
सेलिब्रिटींकडून शुभेच्छांचा वर्षाव
या बातमीनंतर बॉलिवूडमधील अनेक दिग्गज कलाकारांनी विहानचे स्वागत केले आहे. कतरिनाची बहीण इसाबेल कैफने या पोस्टवर प्रेमळ इमोजी शेअर केल्या आहेत. परिणीती चोप्राने “छोटा बडी” असे म्हणत शुभेच्छा दिल्या, तर हृतिक रोशन, दिया मिर्झा, भूमी पेडणेकर, शिबानी दांडेकर आणि अदिती राव हैदरी यांसारख्या अनेक सेलिब्रिटींनी कमेंट्स करत या जोडप्यावर अभिनंदनाचा वर्षाव केला आहे.
View this post on Instagram
कतरिना-विकीचा सुखी संसार
दरम्यान, डिसेंबर 2021 मध्ये राजस्थानमधील ‘सिक्स सेन्सेस फोर्ट बरवारा’ येथे कतरिना आणि विकी यांचा भव्य विवाह सोहळा पार पडला होता. या जोडप्याच्या वयातील फरकाचीही अनेकदा चर्चा होते. कतरिनाचा जन्म 1983 मधील असून ती 42 वर्षांची आहे, तर विकीचा जन्म 1988 मधील असून तो 37 वर्षांचा आहे. वयाचे 5 वर्षांचे अंतर असले तरी, बॉलिवूडमधील हे एक सर्वात समजूतदार आणि लोकप्रिय जोडपे मानले जाते. विहानच्या आगमनाने आता त्यांच्या आयुष्यात सुखाचा नवा प्रकाश आला आहे.
