मुंबई : सर्वांच्या पसंतीच्या ओटीटी शो ‘गुल्लक’चा पाचवा सीझन लवकरच सोनी लिव्हवर प्रदर्शित होणार आहे. या नवीन सीझनमध्ये एक विशेष पात्र दिसणार आहे. अनंत व्ही. जोशी मिश्रा कुटुंबातील एक सुप्रसिद्ध सदस्य, अन्नू भैय्याच्या भूमिकेत दिसणार आहे. ‘गुल्लक’च्या मागील चार सीझन्सना प्रेक्षकांकडून चांगला प्रतिसाद मिळाला होता. त्यानंतर आता पाचवा सीझन येत आहे.
निर्मात्यांनी त्यांच्या सोशल मीडियावर एक सुंदर फोटो शेअर केला आहे आणि कॅप्शनमध्ये लिहिले आहे, “असं दिसतंय… मिश्रा घरात काहीतरी बदललं आहे… तुमच्याही लक्षात येतंय का?” अनंत जोशी ‘गुल्लक’च्या पाचव्या सीझनमध्ये आनंद “अन्नू” मिश्राच्या भूमिकेत सामील झाला आहे आणि प्रेक्षक त्याच्या अभिनयाची आतुरतेने वाट पाहत आहेत. ‘गुल्लक’ हा शो त्याच्या साधेपणा, कौटुंबिक प्रेम आणि दैनंदिन जीवनातील छोट्या-छोट्या घटनांसाठी ओळखला जातो. या सीझनमध्ये मिश्रा घराचे दरवाजे पुन्हा उघडत आहेत.
जुन्या पात्रांसोबतच एक नवीन चेहरा या शोमध्ये सामील होत आहे. अनंत व्ही. जोशी अन्नू भैय्याचे आकर्षण, निरागसता आणि भावनिक नाते पुढे नेताना दिसणार आहे. अनंत व्ही. जोशी म्हणाला, “गुल्लक नेहमीच माझ्या हृदयाच्या खूप जवळ राहिली आहे, कारण मिश्रा कुटुंब मला आमच्या स्वतःच्या कुटुंबाची खूप आठवण करून देते. मला त्यांचा स्नेह, छोटे छोटे क्षण, संवाद आणि ज्या साधेपणाने ते लोकांच्या जीवनाला स्पर्श करतात ते खूप आवडते. मी खूप काळापासून या जगाचा चाहता आहे, त्यामुळे आता त्याचा एक भाग बनणे खूप खास वाटते.”
