पुणे: पुण्यातील शनिपार चौकातील फूटपाथवर भाजी विक्रीचा व्यवसाय करणाऱ्या चरण नामदेव वनवे यांनी राज्यातील पूरग्रस्तांना मदत करण्याच्या उद्देशाने मुख्यमंत्री सहायता निधीला तब्बल 1 लाख 13 हजार 740 रुपयांचे दान दिले आहे. हा धनादेश आज कसबा विधानसभा मतदारसंघाचे आमदार हेमंत रासने यांच्या उपस्थितीत मुख्यमंत्री देवेंद्र फडणवीस यांच्याकडे सुपूर्त करण्यात आला. अशा कठीण परिस्थितीत सामाजिक बांधिलकीच्या भावनेतून चरण वणवे यांनी दाखवलेलं माणुसकीचं उदाहरण सर्वांसाठी प्रेरणादायी ठरत आहे.
वनवे हे शंकर महाराजांचे निस्सीम भक्त असून त्यांच्या घरातील महाराजांच्या पादुकांसमोर एक डबा ठेवला आहे. भाजी विक्रीतून मिळणाऱ्या उत्पन्नातून दररोज 100 रुपये या डब्यामध्ये ठेवले जातात. ही बचत विशेषतः आपत्तीग्रस्तांसाठी केली जाते. आज या बचतीचा निधी मुख्यमंत्र्यांकडे सुपूर्त करून वनवे यांनी आपल्या सामाजिक बांधिलकीची प्रत्यक्ष उदाहरण सादर केले.
दरम्यान, हे दान सामान्य नागरिकांसाठी प्रेरणादायी आहे कारण मोठ्या संस्थांव्यतिरिक्त, लहान व्यवसायांमधील साधे लोकही आपत्तीच्या काळात समाजाच्या मदतीसाठी पुढे येऊ शकतात. मुख्यमंत्री फडणवीस यांनी वनवे यांचा सत्कार करत त्यांच्या या कार्याचे कौतुक केले. वनवे यांचे उदाहरण इतरांनाही सामाजिक जबाबदारीची जाणीव करून देते.
