Mumbai Crime News: मुंबईतील बोरिवली पूर्व परिसरात एका अत्यंत संतापजनक घटनेने खळबळ उडवून दिली आहे. एकाच इमारतीत राहणाऱ्या 65 वर्षीय निवृत्त पोलीस अधिकाऱ्याने त्याच इमारतीमधील 9 वर्षीय अल्पवयीन मुलीवर लैंगिक अत्याचार केल्याची धक्कादायक माहिती समोर आली आहे.
लिफ्टमध्ये केले घृणास्पद कृत्य
मिळालेल्या माहितीनुसार, ही निंदनीय घटना संध्याकाळच्या सुमारास घडली. पीडित मुलगी लिफ्टमधून घरी जात असताना, शेजारी राहणाऱ्या आरोपी निवृत्त पोलीस अधिकाऱ्याने तिला लिफ्टमध्ये खेचले आणि तिच्यावर लैंगिक अत्याचार केला. विशेष म्हणजे, ही संपूर्ण घटना लिफ्टमध्ये लावण्यात आलेल्या सीसीटीव्ही कॅमेऱ्यात स्पष्टपणे कैद झाली आहे. या फुटेजमुळे आरोपीचा गुन्हा उघडकीस आला.
तात्काळ गुन्हा दाखल आणि अटक
अत्याचार झाल्यानंतर घाबरलेल्या मुलीने थेट आपल्या आईला घडलेला सर्व प्रकार सांगितला. मुलीच्या आईने क्षणाचाही विलंब न करता कस्तुरबा मार्ग पोलीस स्टेशनमध्ये धाव घेऊन आरोपीविरुद्ध तक्रार दाखल केली. तक्रारीचे गांभीर्य लक्षात घेऊन कस्तुरबा मार्ग पोलिसांनी तात्काळ कारवाई करत 65 वर्षीय निवृत्त पोलीस अधिकाऱ्याला अटक केली.
आरोपीला 12 डिसेंबरपर्यंत पोलीस कोठडी
अटकेनंतर आरोपीला बोरिवली न्यायालयात हजर करण्यात आले. न्यायालयाने या गंभीर गुन्ह्याची दखल घेत आरोपीला 12 डिसेंबरपर्यंत पोलीस कोठडीत ठेवण्याचे आदेश दिले आहेत. कस्तुरबा मार्ग पोलीस या प्रकरणाचा अधिक तपास करत आहेत.
