Vidya Pratishthan : राज्याचे माजी उपमुख्यमंत्री दिवंगत अजित पवार यांच्या निधनानंतर, त्यांच्याकडील विविध संस्थात्मक पदांच्या वाटणीसाठी पवार कुटुंबियांमध्ये हालचालींना वेग आला आहे. बुधवारी बारामतीच्या विद्या प्रतिष्ठानमध्ये शरद पवार, पार्थ पवार आणि जय पवार यांच्यात एक महत्त्वपूर्ण बैठक पार पडली. अजितदादांच्या रिक्त झालेल्या पदांवर कुटुंबातील कोणत्या सदस्याची वर्णी लागणार, याबाबत या बैठकीत प्राथमिक चर्चा झाल्याचे समजते.
अजितदादांकडील महत्त्वाची पदे आणि वारसदार
अजित पवार हे केवळ राजकारणातच नव्हे, तर शैक्षणिक आणि सहकार क्षेत्रातही सक्रिय होते. त्यांच्या निधनानंतर खालील संस्थांच्या नेतृत्वाचा प्रश्न निर्माण झाला आहे:
- विद्या प्रतिष्ठान: प्रमुख विश्वस्त पद.
- सहकारी संस्था: माळेगाव साखर कारखाना (चेअरमन).
- शैक्षणिक संस्था: पुणे जिल्हा शिक्षण मंडळ (अध्यक्ष) आणि रयत शिक्षण संस्था (संचालक).
- क्रीडा क्षेत्र: महाराष्ट्र ऑलिम्पिक असोसिएशन (अध्यक्ष).
सूत्रांच्या माहितीनुसार, यातील काही महत्त्वाची पदे उपमुख्यमंत्री सुनेत्रा पवार यांच्याकडे सोपवली जाऊ शकतात. तर, जय पवार आणि पार्थ पवार यांच्याकडे संस्थात्मक जबाबदाऱ्यांचे वाटप करून त्यांना सक्रिय राजकारणात अधिक ताकद देण्याचा प्रयत्न या बैठकीतून होण्याची शक्यता आहे.
पार्थ पवार की जय पवार?
सुनेत्रा पवार यांनी उपमुख्यमंत्रीपदाची शपथ घेतल्यामुळे त्यांच्याकडील राज्यसभेची जागा रिक्त होण्याची शक्यता आहे. या जागेवर पार्थ पवार यांना संधी मिळण्याची दाट शक्यता वर्तवली जात आहे. पार्थ पवार राज्यसभेच्या सहा वर्षांच्या पूर्ण टर्मसाठी मोर्चेबांधणी करत आहेत. तसेच जय पवार यांचे नावही चर्चेत असून बारामतीकरांकडून त्यांनाही पाठिंबा मिळताना दिसत आहे.
बैठकीचे राजकीय महत्त्व
विद्या प्रतिष्ठानमधील या बैठकीला विशेष महत्त्व आहे, कारण यामध्ये शरद पवार स्वतः उपस्थित होते. अजितदादांच्या निधनानंतर पवार कुटुंब पुन्हा एकदा एकत्र येऊन संस्थात्मक आणि राजकीय निर्णय घेताना दिसत आहे.
