जर तुम्ही दररोज दात घासले नाहीत, तर तुमच्या हृदयाचा धोका सतत वाढत जातो, असे एका अभ्यासात धक्कादायक सत्य समोर आले आहे. बहुतेक लोकांना वाटते की, दात स्वच्छ ठेवण्यासाठी आणि तोंडाची दुर्गंधी टाळण्यासाठीच दात घासणे आणि फ्लॉसिंग करणे आवश्यक आहे.
सध्या या एका नवीन अभ्यासात असे दिसून आले आहे की, तोंडाच्या आरोग्याचा हृदयावर, विशेषतः हृदयविकाराच्या झटक्यानंतर, गंभीर परिणाम होऊ शकतो. या अभ्यासात काय आढळले ते आम्ही तुम्हाला सांगतो. जपानमधील टोकियो मेडिकल अँड डेंटल युनिव्हर्सिटीने केलेला आणि ‘इंटरनॅशनल जर्नल ऑफ ओरल सायन्स’मध्ये प्रकाशित झालेला एक अभ्यास, एक आश्चर्यकारक संबंध उघड करतो. त्यात म्हटले आहे की तोंडात आढळणारा एक सामान्य जीवाणू हृदयाच्या बरे होण्याच्या प्रक्रियेवर परिणाम करू शकतो. याचा अर्थ असा की, तोंडाचे खराब आरोग्य हृदयविकाराच्या झटक्यानंतर बरे होणे कठीण करू शकते.
हृदयविकाराच्या झटक्यानंतर, शरीर स्वतःला दुरुस्त करण्याचा प्रयत्न करते. यामध्ये ऑटोफॅगी नावाची एक महत्त्वपूर्ण प्रक्रिया समाविष्ट आहे. या प्रक्रियेत, पेशी खराब झालेले भाग स्वच्छ करतात आणि त्यांचा पुनर्वापर करतात, ज्यामुळे हृदयाला बरे होण्यास मदत होते. संशोधकांनी विशेषतः ‘पोरफायरोमोनास जिंजिव्हॅलिस’ नावाच्या जीवाणूवर लक्ष केंद्रित केले. हा जीवाणू तोंडात आढळतो आणि त्यामुळे हिरड्यांचे आजार होतात.
