मुंबई : मुख्यमंत्री देवेंद्र फडणवीस यांनी ‘मुख्यमंत्री माझी लाडकी बहीण’ योजनेच्या दीड वर्षांच्या यशानिमित्त मोठी घोषणा केली आहे. या योजनेअंतर्गत पात्र महिलांना दरमहा १,५०० रुपये मदत मिळते, जी विधानसभा निवडणुकीपूर्वी सुरू झाली होती. आता महायुती सरकारला एक वर्ष पूर्ण होत असताना, फडणवीस म्हणाले की, ही योजना बंद होणार नाही, उलट राज्यातील १ कोटी महिलांना ‘लखपती दीदी’ बनवण्याचे महत्वाकांक्षी लक्ष्य गाठले जाईल. येत्या दोन वर्षांत हे उद्दिष्ट साध्य करण्यासाठी प्रयत्न सुरू आहेत.
देवेंद्र फडणवीस काय म्हणाले?
मुख्यमंत्री फडणवीस यांनी छत्रपती संभाजीनगर येथे आयोजित सभेत सांगितले, “लाडकी बहीण योजना सुरू झाल्यावर काही लोक म्हणत होते की, सत्तेत आल्यावर ही योजना बंद होईल. पण सरकारला एक वर्ष होत असतानाही योजना सुरूच आहे आणि पुढेही सुरू राहील.
आम्ही फक्त १,५०० रुपयांपुरते थांबणार नाही, तर महिलांना आर्थिकदृष्ट्या सक्षम बनवण्यासाठी ‘लखपती दीदी’ मोहीम राबवणार आहोत.” याआधीही त्यांनी अनेक सभांमध्ये ५० लाख ‘लखपती दीद्या’ तयार करण्याचे सांगितले होते, आता ते १ कोटीपर्यंत वाढवले आहे. ही घोषणा महाराष्ट्रातील स्थानिक स्वराज्य संस्था निवडणुकीच्या पार्श्वभूमीवर करण्यात आली आहे.
लखपती दीदी योजना म्हणजे काय?
केंद्र सरकारच्या ‘दीनदयाल अंत्योदय योजना-राष्ट्रीय ग्रामीण आजीविका अभियान’ अंतर्गत सुरू झालेली ही योजना ग्रामीण महिलांना स्वयंसहाय्यता गट मार्फत आर्थिकदृष्ट्या सक्षम बनवते. ‘लखपती दीदी’ म्हणजे अशी SHG सदस्य जिच्या घराच्या वार्षिक उत्पन्नातून १ लाख रुपये किंवा त्याहून अधिक कमाई होते. यामुळे सरासरी महिन्याला १०,००० रुपयांहून जास्त उत्पन्न मिळते.
योजनेचे महत्त्व काय?
लाडकी बहीण योजनेने लाखो महिलांना आर्थिक आधार दिला असला, तरी लखपती दीदी योजनेमुळे त्या स्वावलंबी होत आहेत. ग्रामीण अर्थव्यवस्थेला चालना मिळत असून, महिलांच्या सामाजिक स्थितीत सुधारणा होत आहे. फडणवीस म्हणाले, “महिलांना केवळ मदत नव्हे, तर व्यवसायाची संधी देऊन लखपती बनवणे हे आमचे ध्येय आहे.” स्थानिक निवडणुकीनंतर या योजनेचा विस्तार होईल, अशी अपेक्षा आहे.
