पिंपरी : वेळोवेळी कळवूनही लहान कुटुंबाचे प्रतिज्ञापत्र सादर करण्यास टाळाटाळ केल्यानंतर विभागीय चौकशीत तीन अपत्य असल्याचे स्पष्ट झाल्याने पिंपरी-चिंचवड महापालिकेचे सहायक आयुक्त श्रीनिवास दांगट यांना सेवेतून बडतर्फ करण्यात आले आहे. ही कारवाई आयुक्त तथा प्रशासक शेखर सिंह यांनी केली.
श्रीनिवास दांगट हे पिंपरी-चिंचवड महापालिका सेवेत लिपिक म्हणून रुजू झाले होते. महापालिकेच्या आस्थापनेवरील प्रशासन अधिकारी अभिनामाची सरळसेवेची रिक्त पदे भरतीसाठी २९ जुलै २०१३ या दिवशी जाहिरात प्रसिद्ध करण्यात आली होती. या भरतीच्या अटी व शर्तींच्या अधीन राहून दांगट यांची महापालिका आस्थापनेवरील प्रशासन अधिकारी गट ‘ब’ या पदावर नियुक्ती करण्यात आली होती.
दरम्यान प्रशासन अधिकारी होताना लहान कुटुंबाचे प्रतिज्ञापत्र सादर करणे हे कायद्याने बंधनकारक होते. याबाबत दांगट यांना वेळोवेळी कळवूनही प्रतिज्ञापत्र सादर केले नाही. त्यानंतर दांगट यांच्याविरोधात तक्रार प्राप्त झाल्यानंतर त्यांची विभागीय चौकशी करण्यात आली. या चौकशीअंती श्रीनिवास दांगट यांनी त्यांना तीन अपत्ये असल्याचे मान्य केले. महाराष्ट्र शासनाच्या १ जुलै २००५ च्या लहान कुटुंबाच्या नियमांचे उल्लंघन केल्याचे चौकशीमध्ये आढळून आले. त्यानुसार दांगट यांना महापालिका सेवेतून बडतर्फ करण्याचा निर्णय आयुक्त शेखर सिंह यांनी घेतला आहे.
सहायक आयुक्त पदावर कार्यरत असलेले श्रीनिवास दांगट यांचा सेवा कालावधी २८ फेब्रुवारी २०२५ ला संपणार होता. म्हणजेच ते पावणे दोन महिन्यांनी सेवानिवृत्त होणार होते. निवृतीला त्यांच्या निवृत्तीला अवघ्या दीड महिन्यांचा कालावधी शिल्लक असतानाच त्यांच्यावर बडतर्फीची कारवाई झाली आहे.
