Pune News: पुण्यातील कसबा पेठ भागातून अत्यंत हृदयद्रावक घटना समोर आली आहे. 45 वर्षीय इलेक्ट्रिशियनला चक्क एका कुत्र्यामुळे जीव गमवावा लागला. कामानिमित्त इमारतीत गेलेल्या रमेश गायकवाड यांचा कुत्रा मागे लागल्याने तोल जाऊन तिसऱ्या मजल्यावरून खाली पडून मृत्यू झाला. 1 ऑक्टोबर रोजी घडलेल्या या घटनेनंतर रुग्णालयात उपचार सुरू असताना त्यांचा मृत्यू झाला.
घटनेच्या दिवशी रमेश गायकवाड हे सिद्धिविनायक अपार्टमेंटमध्ये एका सहकाऱ्यासोबत इलेक्ट्रिकचे काम पाहत होते. ते तिसऱ्या मजल्यावर असताना, चौथ्या मजल्यावर राहणाऱ्या सिद्धार्थ दिलीप कांबळे (वय 24) यांच्या कुत्र्याने अचानक त्यांच्याकडे धाव घेतली. त्या अनपेक्षित प्रसंगाने घाबरलेले रमेश पळून जाण्याच्या प्रयत्नात जिन्याजवळील डक्टमध्ये कोसळले. यात त्यांना गंभीर दुखापत झाली. त्यानंतर त्यांना तातडीने रुग्णालयात हलवण्यात आले, मात्र उपचारांचा काहीही उपयोग झाला नाही.
हेही वाचा – Pune: पुणेकरांनो लक्ष द्या! उघड्यावर शेकोटी पेटवल्यास बसणार दंड, थंडीच्या दिवसात महापालिकेचा अजब निर्णय
या प्रकरणी मृताचे पत्नी जया गायकवाड (वय 40) यांनी तक्रार दिल्यानंतर कुत्र्याचा मालक सिद्धार्थ कांबळे याच्याविरुद्ध गुन्हा दाखल करण्यात आला आहे. कुत्र्याला मोकळे सोडणे आणि योग्य नियंत्रण न ठेवणे यामुळे ही घटना घडल्याचा आरोप करण्यात आला आहे. पोलीस उपनिरीक्षक गोरे या प्रकरणाचा पुढील तपास करत आहेत.
