Baramati Crime: बारामती तालुक्यातील सोनगाव येथील सरपंच महिलेच्या पतीच्या हत्येप्रकरणी न्यायालयाने कठोर निकाल दिला आहे. या प्रकरणातील आरोपी कामगाराला बारामती अतिरिक्त सत्र न्यायालयाने जन्मठेपेची शिक्षा सुनावली असून तीन हजार रुपयांचा दंडही ठोठावण्यात आला आहे. अतिरिक्त सत्र न्यायाधीश विजय बर्डे यांनी हा निकाल जाहीर केला. या गुन्ह्यात दोषी ठरवण्यात आलेल्या आरोपीचे नाव पनीश ऊर्फ पांग्या आनंद्या भोसले असे आहे. सोनगाव येथील रहिवासी असलेले युवराज थोरात (वय ५०) यांची हत्या केल्याचा गुन्हा त्याच्यावर सिद्ध झाला. या संदर्भात युवराज थोरात यांच्या मुलाने बारामती तालुका पोलीस ठाण्यात फिर्याद दाखल केली होती.
ही धक्कादायक घटना १५ जानेवारी २०२० रोजी मकरसंक्रांतीच्या दिवशी घडली होती. बारामतीजवळ नीरा–कऱ्हा नदीच्या संगमावर असलेल्या सोनेश्वर मंदिरात दर्शनासाठी आलेल्या युवराज थोरात यांच्याशी आरोपीने वाद घातला. शिवीगाळ करत “सरपंच झाल्यामुळे फार माज आला आहे, एकेकाला भोसकून काढतो,” अशी धमकी देत आरोपीने थोरात यांच्यावर सुर्याने हल्ला केला आणि घटनास्थळावरून फरार झाला.
पुरावे सिद्ध झाल्याने आरोपीला शिक्षा
या खटल्यात सरकार पक्षाच्या वतीने अतिरिक्त सरकारी वकील ज्ञानदेव शिंगाडे यांनी प्रभावी युक्तिवाद केला. त्यांनी एकूण तेरा साक्षीदार न्यायालयासमोर सादर केले. चार प्रत्यक्षदर्शींच्या साक्षी, आरोपीच्या कपड्यांवरील रक्ताचे डाग तसेच गुन्ह्यात वापरलेला सुरा हे महत्त्वाचे पुरावे ठरले आणि त्याच्या आधारे आरोपी दोषी ठरवण्यात आला.
दरम्यान, या घटनेने त्यावेळी संपूर्ण परिसर हादरून गेला होता. सरपंच जयश्री युवराज थोरात यांचे पती असलेल्या युवराज थोरात यांनी महिलेला त्रास देणाऱ्या तरुणाला रोखल्याचा राग मनात धरून आरोपीने हा जीवघेणा हल्ला केल्याचे तपासात निष्पन्न झाले होते. घटनेनंतर संतप्त जमावाने पारधी समाजाच्या घरांना आग लावल्याने परिसरात तणावाचे वातावरण निर्माण झाले होते.
