Pune Fire: पुण्यातील सदाशिव पेठ परिसरात मंगळवारी सकाळी एक मोठी दुर्घटना घडली. रमेश डायिंग नावाच्या कपड्यांच्या प्रक्रियेच्या दुकानात अचानक आग भडकली आणि काही क्षणांतच ती संपूर्ण दुकानात पसरली. विशेषत: दुकानाच्या टेरेसवरील भागातून धुराच्या प्रचंड लोटांमुळे परिसरात भीतीचे वातावरण निर्माण झाले. स्थानिकांनी तत्काळ प्रशासनाला कळविल्यानंतर पुणे अग्निशमन दलाच्या पथकांनी वेगाने घटनास्थळी धाव घेतली.
घटनास्थळी अग्निशमन दलाच्या ५ गाड्या दाखल
घटनास्थळी पोहोचताच अग्निशमन दलाने बचावकार्य सुरू केले. दलाच्या ५ गाड्या आग विझवण्याच्या कामात गुंतलेल्या असून, कर्मचारी ज्वाळांवर नियंत्रण मिळवण्यासाठी सातत्याने पाणी व फोमचा वापर करत आहेत. आगीचा भडका मोठा असल्यामुळे ती नियंत्रणात आणण्यासाठी अग्निशमन दलाला शर्थीचे प्रयत्न करावे लागत आहेत. सुदैवाने, आतापर्यंत कोणतीही जीवितहानी झाल्याची माहिती समोर आलेली नाही. मात्र दुकानातील यंत्रसामग्री आणि साठवलेल्या मालाचे मोठ्या प्रमाणावर नुकसान झाले असण्याची शक्यता व्यक्त केली जात आहे.
हेही वाचा –Pune Press Club: मंत्रिमंडळाचा मोठा निर्णय! पुणे प्रेस क्लबसाठी नव्या प्रशस्त जागेला मंजूरी
शॉर्टसर्किटची शक्यता
आग लागण्यामागील नेमके कारण अद्याप समोर आलेले नसले तरी शॉर्टसर्किटची शक्यता वर्तवली जात आहे. आग पूर्णपणे विझल्यानंतर अग्निशमन दल आणि पोलिसांकडून यासंदर्भात तपास करण्यात येणार आहे. अचानक लागलेल्या या भीषण आगीमुळे सदाशिव पेठमधील नागरिकांमध्ये एकच खळबळ उडाली असून, परिसरात सुरक्षेची अतिरिक्त खबरदारी घेण्यात आली आहे.
