Bajaj Pune Grand Tour 2026: पुणे आता आंतरराष्ट्रीय सायकलिंगच्या नकाशावर झळकणार आहे. बजाज पुणे ग्रँड टूर 2026, भारतातील पहिली UCI 2.2 दर्जाची रोड सायकलिंग शर्यत, 19 ते 23 जानेवारी 2026 दरम्यान पुणे जिल्ह्यात पार पडणार आहे. चार टप्प्यांवरून 437 कि.मी. अंतराचा हा बहुदिवसीय स्पर्धा कार्यक्रम आंतरराष्ट्रीय सायकलिंग कॅलेंडरमध्ये नोंदवला गेला आहे.
उत्सुकता आणि आंतरराष्ट्रीय सहभाग
जगभरातील 28 स्पर्धक संघ या शर्यतीत सहभागी होणार असून, त्यात चार राष्ट्रीय संघांचा समावेश आहे. भारताकडून ‘India A’ आणि ‘India B’ असे दोन राष्ट्रीय संघ उतरतील. युनायटेड किंगडम, फ्रान्स, बेल्जियम, जर्मनी, नेदरलँड्स, ऑस्ट्रेलिया, चीन, मलेशिया, इंडोनेशिया आणि थायलंडसारख्या प्रमुख सायकलिंग राष्ट्रांनी उत्सुकता दाखवली आहे. पुणे जिल्हाधिकारी आणि पुणे ग्रँड टूरचे प्रभारी अधिकारी श्री. जितेंद्र डुडी (IAS) म्हणाले, पहिल्या वर्षाला जगभरातून मिळालेला प्रतिसाद अत्यंत उत्साहवर्धक आहे. हा उपक्रम पुण्यातील पर्यटन, पर्यावरण आणि पायाभूत सुविधा विकासास चालना देईल.
हेही वाचा – अनकॅप्ड खेळाडूंना आयपीएल लिलावात अधिक मागणी कशामुळे ?
चार रोमांचक टप्पे
टप्पा 1: मुलशी-मावळ माइल्स – 91.8 किमी, 956 मीटर उंची
IT हब हिंजवडीतून सुरू होणारा हा टप्पा सपाट स्प्रिंट्स आणि शहरी वळणांचा संगम दर्शवतो.
टप्पा 2: मराठा हेरिटेज सर्किट – 109.15 किमी, 1466 मीटर उंची
पुरंदर किल्ला, सिंहगड आणि खडकवासला तलावाच्या दृष्टीसह घाट चढणारा हा टप्पा सहनशक्ती आणि क्लाइंबिंगची खरी कसोटी आहे.
टप्पा 3: वेस्टर्न घाट्स गेटवे – 137.07 किमी, 820 मीटर उंची
पुरंदरपासून बारामतीपर्यंत डेक्कन पठारावरचा मार्ग वेग, रणनीती आणि क्रॉसविंडमुळे अत्यंत स्पर्धात्मक ठरतो.
टप्पा 4: पुणे प्राईड लूप – 99.15 किमी, 560 मीटर उंची
अंतिम टप्पा पुणे शहरातील आधुनिक आणि ऐतिहासिक स्थळांतून जातो, शनिवार वाड्यासह शहराच्या मध्यभागात शर्यतीचा समारोप होईल.
सायकलिंग आणि पर्यटनाला चालना
चार टप्प्यांवरून जाणारी ही शर्यत शहरातील गतीमान वातावरण, सह्याद्रीच्या पायथ्याची निसर्गरम्यता आणि ऐतिहासिक स्थळांचे दर्शन देईल. यामुळे जागतिक स्तरावरील प्रेक्षकांना आकर्षित करण्यासोबतच पुणे जिल्ह्याच्या पर्यटन, पर्यावरण आणि पायाभूत सुविधा विकासाला चालना मिळेल. बजाज पुणे ग्रँड टूर 2026 पुणेकरांसाठी आणि भारतासाठी ऐतिहासिक टप्पा ठरणार आहे, ज्यातून शहराचा क्रीडा वारसा, नैसर्गिक सौंदर्य आणि आंतरराष्ट्रीय सायकलिंग क्षमतेचे प्रदर्शन जागतिक स्तरावर होणार आहे.
