Pune Railway: नवीन वर्षाच्या पार्श्वभूमीवर रेल्वे प्रवाशांसाठी एक दिलासादायक बातमी आहे. पुणे रेल्वे विभागातून धावणाऱ्या चार प्रमुख विशेष गाड्यांची सेवा आता फेब्रुवारी २०२६ अखेरपर्यंत सुरू ठेवण्याचा निर्णय प्रशासनाने घेतला आहे. डिसेंबरमध्ये संपणारी या गाड्यांची मुदत वाढवल्यामुळे प्रवाशांचा प्रवासाचा मार्ग मोकळा झाला आहे.
‘या’ गाड्यांच्या कालावधीत झाली वाढ:
- सोलापूर-दौंड-सोलापूर (०१४६१/६२): ही अनारक्षित गाडी आता २८ फेब्रुवारीपर्यंत दररोज धावेल.
- पुणे-कोल्हापूर-पुणे (०१०२३/२४): ३१ डिसेंबरला मुदत संपत असलेल्या या गाडीलाही २८ फेब्रुवारीपर्यंत मुदतवाढ मिळाली आहे.
- पुणे-हरंगुळ (लातूर)-पुणे (०१४८७/८८): या गाडीची सेवा २६ जानेवारीपर्यंत नियमित असेल.
- हडपसर-हरंगुळ (लातूर)-हडपसर: २७ जानेवारीपासून ही गाडी हडपसरवरून सुटेल आणि २८ फेब्रुवारीपर्यंत तिची सेवा सुरू राहील.
प्रवाशांची मागणी
पुणे-कोल्हापूर आणि पुणे-लातूर या गाड्यांना प्रवाशांचा प्रचंड प्रतिसाद मिळत आहे. त्यामुळे या गाड्या ‘विशेष’ म्हणून न चालवता त्या कायमस्वरूपी ‘नियमित’ कराव्यात, अशी मागणी प्रवासी संघटनांकडून जोर धरत आहे.
देशभरात २४४ विशेष गाड्यांचे जाळे
केवळ पुणेच नव्हे, तर भारतीय रेल्वेने नवीन वर्ष आणि सुट्ट्यांचा हंगाम पाहता मुख्य ८ मार्गांवर एकूण २४४ विशेष गाड्या चालवण्याचा निर्णय घेतला आहे. यामुळे मुंबई, पुणे आणि नागपूरच्या प्रवाशांना मोठा दिलासा मिळणार आहे. कोकणात जाणाऱ्या भाविकांसाठी आणि पर्यटकांसाठी मुंबई-मडगाव मार्गावर साप्ताहिक तसेच दैनंदिन विशेष फेऱ्यांचे नियोजन करण्यात आले आहे.
हेही वाचा –Konkan Railway: फुकट्या प्रवाशांमुळं कोकण रेल्वे मालामाल! एका महिन्यात 2.33 कोटींचा दंड वसूल
प्रवाशांसाठी महत्त्वाच्या सूचना
रेल्वे प्रशासनाने स्पष्ट केले आहे की, या गाड्यांचे मार्ग, थांबे आणि वेळ यामध्ये कोणताही बदल करण्यात आलेला नाही. आगामी काळात गाड्यांच्या फेऱ्यांमध्ये आणखी वाढ होण्याची शक्यता असल्याने, प्रवाशांनी लेटेस्ट अपडेट्ससाठी IRCTC च्या अधिकृत वेबसाइटला किंवा NTES ॲपला भेट द्यावी.
