Pune Viral Video : पुण्यातील पाषाण परिसरात वाहतुकीचे नियम मोडणाऱ्या दुचाकीस्वारांना एका महिलेने दिलेला अनोखा ‘पुणेरी धडा’ सध्या सोशल मीडियावर चांगलाच चर्चेचा विषय ठरला आहे. रस्त्यावरची कोंडी टाळण्यासाठी फुटपाथला पर्याय म्हणून वापरणाऱ्या वाहनचालकांना या महिलेने ज्या पद्धतीने सुनावले, ते पाहण्यासाठी अनेकांनी हा व्हिडिओ मोठ्या प्रमाणावर शेअर केला.
फुटपाथवरून जाणाऱ्यांची केली हात जोडून ‘आरती’
पाषाणमध्ये झालेल्या वाहतूककोंडीनंतर काही दुचाकीस्वारांनी थेट फुटपाथवरून मार्ग काढण्याचा प्रयत्न केला. मात्र, ही गोष्ट पाहताच एका महिलेने त्यांच्या समोर हात जोडले आणि “या, तुमची आरती ओवाळते” अशा उपहासात्मक शैलीत त्यांना नियमभंगाची जाणीव करून दिली. फुटपाथवरून जात असलेल्या प्रत्येक दुचाकीस्वाराच्या मागे ती महिला काही अंतरापर्यंत धावताना व्हिडिओत दिसते.
खोचक टोला आणि योग्य धडा?
दरम्यान, पुणेकरांचे वैशिष्ट्य असलेली खोचक टिप्पणी या प्रसंगातही पाहायला मिळाली. फुटपाथचा गैरवापर करणाऱ्या वाहनचालकांना तिच्या या कृतीने सार्वजनिकरित्या नियमांचे महत्त्व समजण्याचा संदेश दिला. अनेकांनी याला ‘पुणेरी दणका’ म्हणत पाठिंबा दिला तर काहींनी ही पद्धत अतिशयोक्त असल्याचीही प्रतिक्रिया दिली.
पाषाण येथे फुटपाथ वरून गाडी चालवणाऱ्या लोकांची आरती .. 🫡🏍️ pic.twitter.com/3xKftKWHVZ
— पुणेरी स्पिक्स™ Puneri Speaks (@PuneriSpeaks) December 10, 2025
व्हिडिओ सोशल मीडियावर व्हायरल
दरम्यान, पाषाण परिसरातील हा व्हिडिओ आता सोशल मीडियावर वेगाने व्हायरल होत असून नेटिझन्सकडून मिश्र प्रतिक्रिया उमटत आहेत. काही जणांनी वाहतुकीचे नियम कडकपणे पाळावेत, असे म्हटले तर काहींनी महिलेची धाडसपूर्ण कृती कौतुकास्पद असल्याचे सांगितले. या घटनेनंतर फुटपाथवरून वाहन चालवणाऱ्या नियमभंग करणाऱ्यांवर पुन्हा एकदा प्रश्नचिन्ह निर्माण झाले असून नियमांचे पालन करण्याचे महत्त्व अधोरेखित झाले आहे.
