MPSC Exam Postpone: राज्यातील नगर परिषद आणि नगर पंचायत निवडणुकीच्या मतमोजणीच्या पार्श्वभूमीवर एमपीएससीची २१ डिसेंबर रोजी होणारी पूर्व परीक्षा अखेर पुढे ढकलण्यात आली आहे. काही दिवसांपासून या परीक्षेच्या आयोजनाबाबत विद्यार्थ्यांमध्ये अनिश्चितता निर्माण झाली होती. अखेर आयोगाने अधिकृत परिपत्रक प्रसिद्ध करून नवीन तारखा जाहीर केल्या आहेत.
मतमोजणीच्या दिवशीच परीक्षा असल्याने बदल अपरिहार्य
राज्य निवडणूक आयोगाने २१ डिसेंबर रोजी मतमोजणी पार पाडण्याचे आदेश सर्व जिल्हाधिकाऱ्यांना दिल्यानंतर, परीक्षा आणि मतमोजणी दोन्ही एकाच दिवशी होणार असल्याने प्रशासनाकडून संभाव्य अडचणींचा अहवाल एमपीएससीने मागविला होता. काही जिल्ह्यांनी परीक्षा केंद्र आणि मतमोजणी केंद्र अत्यंत जवळ असल्याचे, लाऊडस्पीकरचा आवाज, वाहतूक कोंडी, विजयी उमेदवारांच्या मिरवणुकांमुळे निर्माण होणारी गोंधळ परिस्थिती तसेच परीक्षा घेण्यासाठी लागणाऱ्या मनुष्यबळाची कमतरता यामुळे आयोगाने परीक्षा पुढे ढकलण्याचा निर्णय घेतला. या पार्श्वभूमीवर, नियोजित तारखेला परीक्षा घेणे व्यवहार्य नसल्याचे दिसताच एमपीएससीने परीक्षा पुढे ढकलण्याचा निर्णय घेतला.
हेही वाचा – MPSC 2026 Exam Schedule : तयारीला लागा! एमपीएससीकडून 2026 मधील परीक्षांचे संभाव्य वेळापत्रक जाहीर
नवीन परीक्षा दिनांक जाहीर
आयोगाने प्रसिद्ध केलेल्या सुधारित वेळापत्रकानुसार, ४ जानेवारी २०२६, ११ जानेवारी २०२६ या दोन दिवसांत महाराष्ट्र गट-क सेवा संयुक्त पूर्व परीक्षा २०२५ आयोजित केली जाणार आहे.
हेही वाचा – राज्यसेवेच्या 385 जागांसाठी रविवारी पूर्व परीक्षा; ‘हे’ महत्वाचे नियम लक्षात घ्या?
विद्यार्थ्यांचा संभ्रम अखेर संपला
परीक्षा पुढे ढकलण्याची मागणी अनेक उमेदवारांकडून होत होती. स्पर्धा परीक्षा विद्यार्थी असोसिएशनचे अध्यक्ष महेश घरबुडे यांनी सांगितले की, २१ डिसेंबरची परीक्षा होणार की नाही याबाबत मोठी अनिश्चितता होती. आयोगाने निर्णय घेऊन नवीन तारखा जाहीर केल्याने विद्यार्थ्यांचा संभ्रम दूर झाला आहे.
