सांगली : सांगली शहरातील शांतिनगर परिसरात शांततेला काळिमा फासणारी भयावह घटना घडली. कौटुंबिक वादाच्या ज्वालेत भडकलेल्या पतीने चाकूने पत्नीचा गळा चिरून निर्घृण हत्या केली. रक्ताच्या थारोळ्यात पडलेली काजल प्रशांत एडके (२८) हिचा जागीच मृत्यू झाला. या घटनेनंतर संशयित पती प्रशांत एडके (३५) याने घराला कडी लावली आणि थेट शहर पोलिस ठाण्यात हजर होऊन संपूर्ण कथा सांगितली. पोलिसही या क्रूरतेच्या कथेने थक्क झाले. महापालिका क्षेत्रात सलग दुसऱ्या दिवशी अशी क्रूर घटना घडल्याने शहरात खळबळ उडाली असून, तपास सुरू आहे.
नेमकं काय घडलं?
मिळालेल्या माहितीनुसार, काजल आणि प्रशांत हे शांतिनगरात भाड्याच्या घरात दोन छोट्या मुलींसोबत राहत होते. काही महिन्यांपासून या दांपत्यात सतत कौटुंबिक वाद सुरू होते. काजल यांच्या कौटुंबिक वादामुळे काही दिवसांपूर्वी त्या बेपत्ता झाल्या होत्या. त्यानंतर प्रशांत याने शहर पोलिस ठाण्यात तक्रार दाखल केली होती. काजल यांचा शोध घेण्यात आला आणि वाद पोलिस ठाण्यासमोरही पोहोचले होते.
मात्र, शनिवार (२८ सप्टेंबर) सकाळी साडेअकरा वाजता घरातील कामकाज उरकून काजल विश्रांती घेत असताना भडकलेल्या प्रशांतने धारदार चाकूने तिच्या गळ्यावर वर्मी वार केले. अतिरक्तस्रावामुळे काजल जागीच मृत्यू पावल्या. घटनेच्या तात्काळ पाठोपाठ संशयित पतीने घराचे दरवाजे लॉक केले आणि पोलिस ठाण्यात धाव घेतली.
तिथे त्याने “मी माझ्या पत्नीचा खून केला आहे” अशी कबुली दिली. पोलिसांना धक्का बसला, पण ताब्यात घेऊन तपास सुरू केला. संशयित प्रशांतला अटक करण्यात आली असून, त्याच्याकडून सखोल चौकशी सुरू आहे. प्राथमिक तपासात कौटुंबिक वाद हे मुख्य कारण असल्याचे समोर आले आहे
