Dondaicha Election: राज्यातील स्थानिक स्वराज्य संस्थांच्या निवडणुकांमध्ये भाजपचे बिनविरोध वर्चस्व वाढत असल्याचे चित्र पुन्हा एकदा स्पष्ट झाले आहे. धुळे जिल्ह्यातील दोंडाईचा नगरपरिषदेने तर एक अनोखा इतिहास रचला असून, येथे एकाही जागेवर विरोधक मैदानात राहिलेले नाहीत. परिणामी नगराध्यक्षांसह सर्व 26 जागांवर भाजप उमेदवार निर्विवाद निवडून आले आहेत. ही स्थिती निर्माण होण्यासाठी मंत्री जयकुमार रावल यांच्या नेतृत्वातील संघटनात्मक तयारी आणि स्थानिक राजकीय समीकरणे निर्णायक ठरल्याचे मानले जात आहे.
पहिल्याच निवडणुकीत सर्व जागा बिनविरोध
दोंडाईचा नगरपरिषदेची स्थापना झाल्यानंतर यंदाची निवडणूक ही पहिलीच होती. मात्र नामनिर्देशनाची प्रक्रिया पूर्ण झाल्यानंतर महाविकास आघाडीच्या सर्व उमेदवारांनी माघार घेतली, ज्यामुळे स्पर्धाच संपुष्टात आली. नगराध्यक्षपदावरही भाजपचीच सरशी झाली असून, या पदासाठी नयनकुमार रावल, म्हणजेच मंत्री जयकुमार रावल यांची मातोश्री, बिनविरोध विजयी झाल्या आहेत. नगराध्यक्षपदासाठी नयनकुमार रावल यांच्या विरोधात महाविकास आघाडीने शरयू भावसार यांना उमेदवारी दिली होती. परंतु भावसार यांच्या अर्जावर भाजपने आक्षेप नोंदवला. आक्षेप असा की, शरयू भावसार यांचे वडील अॅड. एकनाथ भावसार यांच्यावर घरपट्टीची थकबाकी आहे. हा दावा ग्राह्य धरत भावसार यांचा अर्ज बाद करण्यात आला. यानंतर भावसार कुटुंबियांनी धुळे जिल्हा न्यायालयात अपील दाखल केले असून प्रकरण न्यायप्रविष्ट आहे.
राज्यात तीन नगराध्यक्षांची बिनविरोध निवड
नगरपंचायत व नगरपरिषद निवडणुकांपूर्वीच भाजपला बिनविरोध निवडून आलेल्या नगराध्यक्षांच्या रूपाने मोठा फायदा मिळाला आहे. बिनविरोध निवडणून आलेल्या नगराध्यक्षांमध्ये पुढील उमेदवारांचा समावेश आहे.
● सोलापूरच्या अनगर नगरपंचायतीत— माजी आमदार राजन पाटील यांच्या सुनबाई प्राजक्ता पाटील बिनविरोध
● धुळ्यातील दोंडाईचा नगरपरिषदेचे— मंत्री जयकुमार रावल यांच्या मातोश्री नयनकुमार रावल बिनविरोध
● जळगावच्या जामनेर नगरपालिकेत— भाजप नेते गिरीश महाजन यांच्या पत्नी साधना महाजन बिनविरोध
