Asaduddin Owaisi Solapur Speech: अजित पवार सध्या नरेंद्र मोदींच्या गोदीत जाऊन बसले आहेत. त्यामुळे अजित पवारांच्या उमेदवाराला मतदान करणे म्हणजे मोदींच्या धोरणांना आणि त्यांनी आणलेल्या वक्फ कायद्याला पाठिंबा देणे होय, अशा बोचऱ्या शब्दांत एमआयएमचे अध्यक्ष असदुद्दीन ओवैसी यांनी महायुतीवर निशाणा साधला. सोलापूरच्या ‘नई जिंदगी’ परिसरात झालेल्या सभेत त्यांनी अजित पवार गटाचे उमेदवार तौफिक शेख यांच्यावरही कडाडून टीका केली.
एक दिवस हिजाब परिधान केलेली महिला पंतप्रधान होईल
भारतीय संविधानाचा गौरव करताना ओवैसी म्हणाले की, “डॉ. बाबासाहेब आंबेडकरांनी दिलेल्या संविधानामुळेच आज प्रत्येक भारतीयाला पंतप्रधान होण्याची संधी आहे. पाकिस्तानच्या घटनेत केवळ एकाच धर्माचा व्यक्ती राष्ट्रप्रमुख होऊ शकतो, पण भारतात तसे नाही. मला पूर्ण विश्वास आहे की, एक दिवस हिजाब घालणारी महिला या देशाची पंतप्रधान बनेल. तो दिवस पाहण्यासाठी कदाचित मी जिवंत नसेन, पण तो दिवस नक्की येईल.”
हेही वाचा – अंबरनाथमध्ये भाजपची फोडाफोडी अयशस्वी! शिंदे सेना अन् अजित पवारांची हातमिळवणी; सत्तेचं समीकरण पुन्हा पालटलं
अजित पवारांना थेट आव्हान
अजित पवारांवर टीका करताना ओवैसींचा पारा चढलेला पाहायला मिळाला. ते म्हणाले, “तुमचा राजकीय बाप असलेल्या अजित पवारांना माझ्या समोर बसवा, तीन मिनिटांत त्यांना निरुत्तर केले नाही तर सांगाल. त्यांना दर्गा किंवा मशिदींशी काहीही देणेघेणे नाही, ते केवळ तुमच्या डोळ्यात धूळफेक करत आहेत. मोदी, शिंदे आणि अजित पवार ही एकच त्रिमूर्ती आहे.”
सोलापूरसाठी आश्वासनांची खैरात
ओवैसी यांनी सोलापूरच्या विकासासाठी अनेक आश्वासने दिली. त्यांनी नई जिंदगी परिसरात १६ इंची पाण्याची पाईपलाईन आणि प्रलंबित रस्त्यांची कामे मार्गी लावण्याचे आश्वासन दिले. तसेच फातिमा शेख यांच्या कार्याचा उल्लेख करत मुस्लीम मुलींच्या शिक्षणावर भर देण्याचे आवाहन केले. एमआयएमचे चार नगरसेवक निवडून आल्यास या परिसरासाठी स्वतंत्र रुग्णवाहिका (Ambulance) सुरू करणार असल्याचे आश्वासनही यावेळी त्यांनी दिले.
