मेलबर्न: ऑस्ट्रेलियाविरुद्धच्या बॉक्सिंग डे कसोटीपूर्वी भारतीय कर्णधार रोहित शर्माला दुखापत झाली आहे. रविवारी सरावादरम्यान रोहितच्या गुडघ्याला दुखापत झाली. खरंतर, रोहित थ्रो डाउन स्पेशालिस्टसोबत सराव करत होता, तेव्हा चेंडू त्याच्या पॅडला लागल्याने तो जखमी झाला. बॉर्डर-गावस्कर ट्रॉफीचा चौथा सामना 26 डिसेंबरपासून मेलबर्नमध्ये खेळवला जाणार आहे आणि त्याच्या चार दिवस आधी रोहितची दुखापत ही भारतासाठी चांगली बातमी नाही.
भारत आणि ऑस्ट्रेलिया यांच्यातील पाच सामन्यांची कसोटी मालिका सध्या १-१ अशी बरोबरीत आहे. पुढील कसोटी सामना जिंकून मालिकेत आघाडी घेण्यावर भारतीय संघाचे लक्ष असेल. रोहितपूर्वी भारतीय संघाचा फलंदाज केएल राहुललाही सरावाच्या वेळी दुखापत झाली होती. राहुलच्या हाताला दुखापत झाल्याने फिजिओला मैदानात यावे लागले.
दरम्यान रोहितला वेदना होत असल्याचे चित्र सोशल मीडियावर व्हायरल होत आहे, ज्यामध्ये तो गुडघ्यावर बर्फाचा पॅक लावताना दिसत आहे. रोहित या मालिकेत पुन्हा फॉर्म मिळविण्यासाठी धडपडत आहे. रोहितची दुखापत किती गंभीर आहे, हे अद्याप समजू शकलेले नाही. त्याचवेळी, राहुलच्या दुखापतीबाबत कोणतीही स्पष्टता नाही आणि संघ व्यवस्थापनाने देखील त्याने वैद्यकीय मदत का मागितली याबद्दल कोणतेही स्टेटमेंट जारी केलेले नाही. राहुल सध्या चांगलाच फॉर्मात आहे, त्याने सहा डावांत 47 च्या सरासरीने 235 धावा केल्या आहेत.
